Yehofan Seeda Diobun Bandu Yee baatere ta sãawa mi tɔmba ra mɛnnɛ bu ka Yehofa sã. Yen sɔ̃na, n weenɛ sa n te nɛnɛ ta n dɛɛre, ta n waabu wã, kpa ten gani ka bɔkusa yi n wã. Sɔmbu ten bweseru ta sãawa bɛɛrɛgiru, ya maa sãa girim bɛsɛn sãaru sɔɔ. Bɛsɛn baawure koo kpĩ u win baa ko sɔmbu te sɔɔ.

Sa ko tii wɛ̃ su ka kura sà n mɛnnɔ kpa. Mɛnnɔ baageren kpeerɔ, kĩnasibu ba ra Bandu Yeru kure. Gasɔ ka gasɔ, sa ra maa saa sue su ka Bandu Yee te dɛɛrasia mam mam. Guro guro ǹ kun mɛ sɔm kowo dɛro goo u ra n sɔmbu ten nɔni do, u n baadomma yaaye ye ka ye n weenɛ bu ko. Sa ko kpĩ su tii wɛ̃ sɔrɔkudo kurabu sɔɔ, gabu dii ten tem teabu sɔɔ, ǹ kun mɛ yen sunkubu sɔɔ, kitanun sunkubu, ka kokunun dɛɛrasiabu ka tibu. Gabu maa bu fɛnɛnti ka dikiba tea, bu kubanu wia ǹ kun maa mɛ bu tɔɔwu ka bɔkusa dɛɛrasia. Wɔ̃ɔ baagere, baa n nɔn teeru n na, tɔ̃ɔ teera ra n yi bu ka dɛɛrasia bakabu ko. Sà n bɛsɛn bibu sɔmbu te koosiamɔ fiiko fiiko, ba koo tubu ma n weenɛ bu bɛsɛn sãa yeru bɛɛrɛ wɛ̃.—Waasu kowo 4:17.

Gãanu nù n wãa ni n weenɛ bu sɔmɛ, su nɔma kɛ̃ɔ. Wɔ̃ɔ baagere, ba ra Bandu Yeru wɛ̃ɛri ta n dɛɛre, saa ten sɔɔn di sere ka tɔɔwɔ. Bà n wa n weenɛ bu gam sɔmɛ, ǹ kun mɛ bu gãanu kɔsi, ba ra ye kowa yu ku ra ka gobi dii bakabu na. (2 Bandun Gari 24:13; 34:10) Bandu Yeru tà n dɛɛre ma ta waabu wã, ta ra n girima mɔ Gusunɔn sãaru sɔɔ. Sà n nɔmu doke sɔmbu te sɔɔ, sa sɔ̃ɔsimɔ ma sa Yehofa ka win sãa yeru gɔ̃ru doke too. (Womu 122:1) Sà n mɔ̀ mɛ, ya koo maa seeda gea di tɔmbun wuswaaɔ.—2 Korinti 6:3.

• Mban sɔ̃na n ǹ weenɛ su bɛsɛn sãa yeru deri disinu sɔɔ?

• Sɔma nirà sa ra ko bɛsɛn Bandu Yeru ta n ka dɛɛre?