Pa Mayanda ya Bufumu aya Nte sha kwa Yehova palaba ishina lya kwa Lesa, ilya mushilo. Kanshi umulimo wa kuwamya no kulungisha ifileonaika pa Ing’anda ya Bufumu pa kuti ilemoneka bwino, mulimo uwacindama mu kupepa kwesu ukwasanguluka. Uuli onse kuti abombako uyu mulimo.

Mulewamyako Ing’anda ya Bufumu pa numa ya kulongana. Lyonse pa numa ya kulongana bamunyinefwe ne nkashi balaitemenwa ukuwamyako mu Ng’anda ya Bufumu patali patali. Kulaba ubushiku bumo mu mulungu ilyo kuba ukuiwamya sana. Eluda nelyo umubomfi utumikila alapeelwa umulimo wa kupekanya ifyo imilimo ifwile ukubombwa. Bamunyinefwe ne nkashi balaitemenwa ukubombako imilimo pamo nga ukupyanga, ukukolopa, ukupukuta ifipuna na mabenci, ukuwamya amawindo, ifimbusu ne filola ifibamo, ukupoosa ifisooso, no kuwamya ulubansa. Cila mwaka kulaba ubushiku bumo ubwa kuwamya fyonse fye pa Ng’anda ya Bufumu. Nga tulesenda abana besu mu kuwamya ififulo fyesu ifya kulonganinapo, ninshi tulebasambilisha ukucindika ifi fifulo.—Lukala Milandu 5:1.

Mulebombako nga kuli ukuwamya ifyaonaika. Cila mwaka kulaba ukuceeceeta Ing’anda ya Bufumu mu kati na ku nse. Nga kuli ifyonaike, tulalungisha pa kuti Ing’anda ya Bufumu ilemoneka bwino na pa kuti tafyonaikilile ica kuti twaisapoosapo indalama ishingi pa kufilungisha. (2 Imilandu 24:13; 34:10) Ing’anda ya Bufumu iyo tupepelapo Lesa ifwile ukulamoneka bwino. Nga tulebombako uyu mulimo, cikamoneka ukuti twalitemwa Yehova kabili twalicindika ne fifulo tupepelapo. (Amalumbo 122:1) Abantu bambi nabo bakacindika ukupepa kwesu. —2 Abena Korinti 6:3.

• Mulandu nshi tufwile ukulasungila bwino Amayanda ya Bufumu?

• Finshi cila cilonganino cifwile ukulacita pa kuti Ing’anda ya Bufumu ilemoneka bwino?