Tiap-tiap Bale Kinirajan Saksi-Saksi Jahwe maba gelar Dibata si badia. Emaka, menurut kami alu ikut njaga bangunen e tetap bersih, metunggung, ras mejile, eme sada hak istimewa ras bagin penting i bas ibadat kami si badia. Kerina banci ikut ngurus Bale Kinirajan.

Alu meriah ukur mbersiken Bale Kinirajan kenca dung perpulungen. Tep-tep dung perpulungen, nterem turang-senina alu meriah ukur ikut mbersihken ras mpesikap Bale Kinirajan. Sekali seminggu Bale Kinirajan ibersihken. Sekalak pertua ntah pe sinampati perpulungen banci ngaturken dahin si arus ilakoken, biasana rikutken daftar periksa si enggo i bahan. Tergantung keperlun, lit si alu sukarela napui, ngepel, ngelap, mpesikap kursi, mbersihken kamar mandi, mbersihken kaca ras curmin, ngambekken sampah ku inganna, ntah pe mbersihkan bagin darat ras kesain Bale Kinirajan. Silang-langna sekali setahun, ibahan sada wari lako mbersihken kerina bagin Bale Kinirajan. Alu maba anak-anak ikut erdahin, kami ngajar ia gelah ngergai ingan ibadat kami.​—Pengerana 5:1.

Alu meriah ukur nampati adi lit si man pekenan. Tep-tep tahun, ilakoken pemeriksan kerina bagin arah bas ntah pe darat Bale Kinirajan. Kenca e, dahin mpesikap dingen pekena Bale Kinirajan ilakoken alu ratur, gelah ula sempat ceda ras perlu biaya mbelin guna pekenasa. (2 Kronika 24:13; 34:10) Bale Kinirajan si bersih dingen mehuli, metunggung man ingan kami pulung guna nembah Dibata Jahwe. Alu ikut i bas dahin e, kami ncidahken maka kami ngkelengi Jahwe ras ngergai ingan ibadat kami. (Masmur 122:1) Si e kerina erbahan jelma si enterem ngidah maka kami mehuli.​—2 Korinti 6:3.

• Ngkai maka kami arus mpesikap ras mpekena ingan ibadat kami?

• Pengaturen kai si ibahan lako njaga kebersihen Bale Kinirajan?