Nyankopɔn dzin krɔnkrɔn no da Jehovah Adasefo Ahendzi Asa biara do. Ntsi, yebu no dɛ ɔyɛ hokwan dɛ yɛbɔboa ma dan no ho atsew, na yeesiesie biribiara kama ma hɔ aayɛ fɛw. Ɔyɛ ɔsom krɔnn a yɛdze ma Jehovah no ne fã a no ho hia. Hɛn nyinara botum aboa.

Tu woho kyɛ aber a wɔapon asafo nhyiamu no na siesie hɔ bi. Sɛ wɔpon asafo nhyiamu biara a, enuanom mbarimba nye mbaa dze enyigye siesie Ahendzi Asa no do nye egyananbea hɔ kakra. Dɛ mbrɛ asafo no nsɛm tsebea tse no, wɔgye ber pɛnkor wɔ dapɛn anaa bosoom biara mu dze siesie Ahendzi Asa no do yie. Asafo mu panyin anaa ɔsomfo bi na ɔhwɛ edwuma yi do, na mpɛn pii no odzi nhyehyɛɛ pɔtsee bi a wɔakyerɛw no do ma oeehu ndzɛmba a ɔsɛ dɛ wodzi ho dwuma. Sɛ no ho behia a, ankorankor tu hɔnho kyɛ yiyi ntentan fi dan no mu, pepa huntuma, prapra hɔ, na wɔpepa anaa wɔhohor famu hɔ. Wɔsan so pepa ngua ho na wɔhyehyɛ, pepa ntokura ho, dze edur siesie egyananbea hɔ, afei wɔhwɛ siesie paado hɔ nye Ahendzi Asa no ho nyinara ma no ho tsew na wɔtow nwura gu. Annyɛ yie koraa no, woyi da bi si hɔ wɔ afe no mu dze yɛ nsiesie kɛse paa wɔ Ahendzi Asa no do. Sɛ yɛma hɛn mba yɛ ndwuma no bi a, nna yɛrekyerɛkyerɛ hɔn ma woeenya obu ama beebi a yɛsom no.​—Ɔsɛnkafo 5:1.

Sɛ no ho behia dɛ wosiesie ndzɛmba wɔ Ahendzi Asa no do a, tu woho kyɛ na boa. Afe biara, wɔhwehwɛ mbrɛ Ahendzi Asa no do nye n’ekyir nyinara tse no yie. Yegyina dza wohu no do yɛ nhyehyɛɛ siesie biribiara a wɔakɔ kyew no kama, na iyi boa hɛn ma yɛnnsɛɛ sika dɛ mbrɛ ɔnnsɛ. (2 Mbermunsɛm 24:13; 34:10) Ɔfata dɛ yɛsom hɛn Nyankopɔn no wɔ Ahendzi Asa a no ho tsew na wɔhwɛ siesie no yie do. Sɛ yesiesie Ahendzi Asa no do bi a, yɛdze kyerɛ dɛ yɛdɔ Jehovah na yɛwɔ obu ma beebi a yɛsom no. (Ndwom 122:1) Iyi so dzi adanse pa wɔ apaamu hɔ.​—2 Corinthfo 6:3.

• Ebɛnadze ntsi na ɔsɛ dɛ yɛma hɛn enyi kũ beebi a yɛsom no ho?

• Ebɛn nhyehyɛɛ na wɔayɛ na ama Ahendzi Asa no do nye no ho aatsew?