E kaotiotaki aran te Atua ae tabu n aia Tabo n Taromauri nako Ana Tia Kakoaua Iehova. Ngaia are ti ataia bwa bon te mwakuri ae rine ao e kakawaki naba ngkana ti ibuobuoki ibukini kateimatoaan itiakin, taraaraoin ao onobwaian ara Tabo n Taromauri, bwa bon iteran naba ara taromauri ae tabu. Ti kona ni bane n ibuobuoki ni karaoa anne.

Te anganano ibukin te kaitiaki ae uarereke imwin te botaki. Ni katoatai imwini bobotaki, ao a kukurei taari mwaane ao aine ni karaoa te kaitiaki ae uarereke ibukin taraaraoin te Tabo n Taromauri. E kakaraoaki te kaitiaki ae bati riki ni katoa wiki. E kaira waakinan te kaitiaki te unimwaane ke tabonibain te ekaretia, ni karaoi bwaai ni kabane ake a riai ni karaoaki. Ni kaineti ma baika a na karaoaki, a anganano aomata n tatabemania nako ibukin taean ao kaitiakan aon te timanti, te taebubu, kaitiakani kaintekateka ao te roki, ireani winto ao kiraati, karenakoani maange, ke iaakinan ao rikoani maange i tinanikun te tabo n taromauri. E kakaraoaki ni katoa namwakaina te kaitiaki ae bubura. Ngkana ti kanakoia natira bwa a na ira te kaitiaki, ti reireinia iai bwa a na karinea te tabo n taromauri.—Te Minita 5:1.

Aanga nanom n ibuobuoki ngkana iai te onobwai ae e na karaoaki. E karaoaki ni katoa ririki tuoan raoi nanon ao tinanikun te Tabo n Taromauri. Ni kaineti ma te tutuo ae kakaraoaki aei, e na kateimatoaaki te onobwai ibukin taraaraoin te tabo n taromauri bwa e ibuobuoki ibukini kauarerekean te kabanemwane. (2 Rongorongo 24:13; 34:10) Bon te tabo ae rine ibukin taromaurian te Atua, te Tabo n Taromauri ae itiaki ma ni kateimatoaaki taraaraoina. Ngkana ti ibuobuoki ni karaoa aei, ti kaota iai tangiran Iehova ao kakawakin ara tabo n taromauri. (Taian Areru 122:1) E na korakora anaakin nanoia aomata n ara Tabo n Taromauri.—2 I-Korinto 6:3.

• Bukin tera bwa ti riai n tararuaa ara tabo n taromauri?

• Baikara babaire aika katauraoaki ibukini kateimatoaan itiakin ara Tabo n Taromauri?