Nünüliamaasü Maleiwa süpüshuaʼa tü Piichi Outkajaaleekat. Müsüjeseʼe wuleinjatüin jee anainjatüin shia. Kojutüinjatü wamüin epitajaa tü Piichi Outkajaaleekat süka sünainpünaain shia waʼyataain nümüin Maleiwa otta aʼyataainjana waya wapüshuaʼa sünain.

Wepitaja shia sujutaapa tü outkajawaakat. Sujutaapa wanee outkajawaa, nepitajüin na wawalayuukana tü Piichi Outkajaaleekat. Jee semaanawai, epitajünüsü tü piisokot sümaa suʼlojunüin, alaʼajünüsü tü einaseekat sümaa shiʼitaanüin süchikuaʼa, oʼlojoonüsü tü oʼoojuleekat, alaʼajünüsü tü wentaanakat sümaa tü rouyakat, ojotunüsü tü wasuurakat otta epitajünüsü anuuipaʼapünaa. Nia oʼuniraka sukuwaʼipa tia wanee laülaashi jee niale wanee aʼyataai niʼipajee. Jee juyawai, aneekünüsü wanee kaʼi süpüla wuleinjatüin atumawaa süpüshuaʼa tü Piichi Outkajaaleekat. Süküjünüle kasainjatüin naainjüin na tepichikana, ekirajünüshii naya süpüla kojutüin namüin tü Piichi Outkajaaleekat (Eclesiastés 5:1).

Wakaaliinja sünain anaataa tü Piichi Outkajaaleekat. Juyawai, achajaana achikit kasain mojuin sünain tü Piichi Outkajaaleekat. Tia, süpülajatü sünaatünamaatüin jee nnojoluin sükataajünüin wainma nneerü mepipa shia (2 Crónicas 24:13; 34:10). Anale sümaa wulein wanee Piichi Outkajaalee, anashiisü süpüla aʼwaajaa chi Wamaleiwasekai. Waʼyataale süpüla anain tü Piichi Outkajaaleekat, jaʼyeerü waaʼu kojutüin maʼin shia wamüin otta alin maʼin wapüla Jeʼwaa (Salmo 122:1). Otta müsia, aneerü maʼin sünüiki wayuu süchiki (2 Corinto 6:3).

• ¿Jamüsü weisalajüinjatka tü Piichi Outkajaaleekat?

• ¿Kasa aainjünaka süpüla wulein tü Piichi Outkajaaleekat?