Yehauvas Cov Timkhawv siv tej Tsev Nceeg Vaj los txhawb Vajtswv lub npe dawb huv. Qhov uas peb tu thiab kho lub tsev ntawd kom zoo nkauj, yeej yog kev pe hawm Vajtswv. Peb txhua leej txhua tus muaj feem koom tu ib yam.

Sib pab tu tsev tom qab kev sib txoos. Tom qab txhua txojkev sib txoos cov kwvtij nkauj muam sib pab nroos tu lub Tsev Nceeg Vaj qho ntsis. Tiamsis txhua lub lim tiam, yuav tau teem ib lub sijhawm los ua tib zoo tu. Ib tug txwj laus lossis tub leg num yuav tau saib xyuas thiab faib haujlwm rau cov kwvtij nkauj muam. Lawv yuav tu raws li daim ntawv kom tseg, seb yuav tu yam twg. Ib txhia yuav cheb tsev, txhuam tsev, nqus tsev, cheb pluas plav, teeb rooj tog kom sib ncag, tu tsev dej, so tej qhov rais, tej tsom iav, muab tej suab tsuag pov tseg, lossis sua tej tog vaj tog tsev kom du lwb lug. Tsis tas li ntawd xwb, ib xyoos twg lub koom txoos yuav tau teem ib hnub los tu tag nrho lub Tsev Nceeg Vaj, sab hauv sab nraud tibsi. Yog tias peb cob qhia tej metub menyuam los pab peb tu tsev, lawv yuav paub saib taus lub tsev uas peb siv los pe hawm Yehauvas.​—Laj Lim Tswvyim 5:1.

Nqes tes pab kho lub Tsev Nceeg Vaj. Ib xyoos twg, yuav tsum muaj neeg tshuaj xyuas lub Tsev Nceeg Vaj thoob plaws sab hauv sab nraud huvsi, seb puas cheem tsum kho qhovtwg. Yog tias peb ua li no lub Tsev Nceeg Vaj yuav tsis puas ntau ces yav tom ntej yuav kho tsis kim. (2 Vaj Keeb Kwm 24:13; 34:10) Yuav tau tu lub Tsev Nceeg Vaj kom huvsi thiaj tsim nyog peb siv los pe hawm Vajtswv. Yog tias peb koom tes sib pab tu lub Tsev Nceeg Vaj, qhia tau tias peb hlub Yehauvas thiab saib lub tsev pe hawm Vajtswv rau nqe. (Ntawv Nkauj 122:1) Tsis tas li ntawd xwb, lub tsev uas huv siab si yuav ua rau ib zej tsoom sawvdaws pom thiab qhuas Yehauvas.​—2 Khaulee 6:3.

• Vim li cas peb yuav tsum nco ntsoov tu lub Tsev Nceeg Vaj?

• Cov kwvtij tau npaj li cas los tu kom lub Tsev Nceeg Vaj huv siab?