Etuwo rOmerikotameneno rOvahongonone vaJehova ri tjinda ena raMukuru eyapuke. Okutja tu vara okukara norupa mokutjinda etuwo retu ndi mongaro osemba nongohoke, otjondjingonekero nu tu tji vara otjorupa orunanḓengu rwomerikotameneno wetu omayapuke. Avehe mave yenene okukara norupa mo.

Riyandjera okukohorora etuwo ndi kombunda yombongarero yombongo. Kombunda yombongarero aihe, ovakambure avehe ve kara nonyuṋe okukohorora Etuwo rOmerikotameneno kaṱiṱi. Otjikando tjimwe motjivike atjihe, ovandu ve kohorora etuwo ndi nawa. Omunene wombongo poo omuvatere wombongo ongu hongorera oviungura mbi, ama tara mombapira kutja ovikeṋa mbi mavi sokuungurwa. Otja kohepero ndji ri po, ovandu tjiva ve vatera okukomba nokukoha, varwe ve yenena okuyeka oruuma koviṋa, okuṱuna ovihavero kutja vi kare moruteto, okukoha otuiho noviritarero, okutirahi ovikatinga, nokukohorora orumbo rwEtuwo rOmerikotameneno. Otjikando tjimwe mombura aihe, pe zikamisiwa eyuva rimwe romakohororero omanenenene. Mokuyandjera kutja ovanatje ve kare norupa momakohororero nga, eṱe tu ve honga kutja ve raise ondengero kEtuwo retu rOmerikotameneno.​—Omuzuvarise 5:1.

Vatera okuṱuna ngamwa oviṋa mbi mavi hepa okuṱunwa. Ombura aihe, pe kara omakonḓononeno wEtuwo retu rOmerikotameneno, okuza moukoto nga pendje. Okuisira komakonḓononeno ngo, pe kara omaṱunino woviṋa otjikando atjihe kutja etuwo retu ri kare mongaro ombwa, nu ihi tji vatera kutja atu ha ungurisa ovimariva ovingi pu pe he ri ohepero. (2 Ekuruhungi 24:13; 34:10) Etuwo rOmerikotameneno ekohoke nu ndi ṱunwa nawa ooruveze orusemba okurikotamenena ku Mukuru wetu. Tji twa kara norupa mokukohorora etuwo retu ndi, eṱe matu raisa kutja tjiri twa suvera Jehova nu tu vara oruveze rwetu rwomerikotameneno kutja orunanḓengu. (Epsalme 122:1) Ihi wina tji tu munikisa nawa kovandu momaturiro wetu.​—2 Ovakorinte 6:3.

• Omena ratjike tji tu ha sokutjinda oruveze rwetu rwomerikotameneno ouhazendu?

• Ozondyero zeṋe zokukohorora Etuwo rOmerikotamenenonḓazikamisiwa?