Tiap iti Palan Gempuru Saksi-Saksi Jehovah bekaul enggau nama Petara ti kudus. Nya alai, pengawa kami ke nyaga pemeresi sereta nyeruri Palan Gempuru nya siti basa, lalu tu mega siti ari chara kami meri sembah ti tuchi ngagai Petara. Semua orang ulih enggau pengawa tu.

Sukarela ngereja pengawa meresi pengudah begempuru. Tiap kali pengudah begempuru, bala menyadi Kristian enggau gaga ati meresi Palan Gempuru ngambika kemas. Pengawa meresi enggau silik mega bisi diatur enggau tetap. Seiku tuai gempuru tauka penulung gempuru deka ngatur pengawa nitihka lis ke udah ditetapka. Nitihka utai ti diguna, bala menyadi Kristian ulih nulung nyapu, ngemop, vakium lantai, muai abuk, nusun kerusi, meresi jamban, nuchi cheremin, muai sampah, tauka meresi utai ba luar Palan Gempuru. Dalam kandang setaun, kami sigi bisi sekali ngatur pengawa meresi enggau silik agi. Kami mega mai bala anak kami ngereja pengawa tu, lalu tu ulih ngajar sida bebasaka endur kami nyembah Petara.—Pengajar 5:1.

Deka nulung enti bisi utai ke patut diaduka. Ninting taun, pengawa meresa Palan Gempuru enggau silik, ari dalam enggau ari luar, bisi dipejalaika. Kereja nyeruri patut digaga enggau tetap ngambika Palan Gempuru mengkang manah, lalu tu mega ulih nyeliahka belanja ke enda patut. (2 Bansa Israel 24:13; 34:10) Ketegal Palan Gempuru nya endur kami nyembah Petara, nya kebuah endur tu patut beresi sereta mengkang dijaga enggau manah. Enggau besaup ngereja pengawa tu, kami ngayanka diri rinduka Jehovah sereta endur kami nyembah Iya. (Masmur 122:1) Pia mega, tu ngasuh orang ke diau semak kami bisi runding ti manah pasal pengarap kami.—2 Korint 6:3.

• Nama kebuah kami patut nyaga endur kami nyembah Petara?

• Nama atur ke bisi digaga ngambika Palan Gempuru mengkang beresi?