Yehowa Sakse Ni a Nawku Htingnu shagu gaw, Karai Kasang a chyoi pra ai amying hpe hkam la da ai. Dai majaw anhte gaw, htingnu hpe san seng hkra, yu tsawm hkra, atsawm sha gram lajang ai lam ni hta karum ya lu ai hpe, laksan ahkaw ahkang re ai hte, chyoi pra ai nawku htung a ahkyak ai lam langai hku mu mada ma ai. Ndai bungli hta yawng karum ya mai ai.

Zuphpawng ngut ai hpang shawang myit hte jasan jaseng galaw ma ai. Zuphpawng ngut shagu Nawku Htingnu san seng nga hkra, hpunau nauna ni gaw angwi apyaw hte jasan jaseng ma ai. Jasan jaseng ai bungli hpe ayan shakut nna galaw ma ai. Ndai bungli hpe myitsu salang shing nrai, magam tau langai woi awn nna, lit jahkrat da ai hte maren galaw ma ai. Ra rawng ai lam hta hkan nna, ding-ye ye, dun katsut, nhpu katsut, lahkum shara jahkrat, namdum jasan jaseng, hku wawt chyinghka hte pat hpe katsut, maza kabai, htingnu shinggan hte wang ni hpe jasan jaseng ma ai. Yawm htum, laning mi hta kalang Nawku Htingnu ting hpe ahkri ahkrai jasan jaseng ma ai. Nawku ai shara hpe hkungga chye hkra, ma ni hpe sharin ya ai hku nna, bungli nkau hta shanhte hpe mung shalawm ai. ​—⁠Hpaji 5:1.

Ra rawng ai lam ni hpe gram lajang ai hta karum ya ai. Nawku Htingnu a kata hte shinggan hpe shaning shagu atsawm sha jep ai. Ra rawng ai hta hkan nna, ayan gram lajang ai majaw Nawku Htingnu gaw kaja nga nna, nra ai sha gumhpraw ma ai lam ni n nga ai. (2 Hkawhkam Labau 24:13; 34:10) Karai Kasang hpe nawku ai shara gaw san seng nga nna, atsawm sha gram lajang da ai shara byin ra ai. Anhte gaw ndai bungli ni hta shang lawm nna, Karai Kasang hpe tsawra ai lam madun ma ai. (Shakawn 122:1) Ndai hku galaw ai majaw, buga hta Karai Kasang a amying hpe grau shakawn shagrau lu ai. 2 Korinhtu 6:3.

• Nawku ai shara ni hpe anhte hpa majaw yu lajang a ta?

• Nawku Htingnu galoi mung san seng nga na matu gara lamang ni nga a ta?