Man la ka Ïing Hima jong ki Nongsakhi U Jehobah ki pyndonkam ïa ka kyrteng bakhuid jong U Blei. Na kata ka daw, ngi sngew ba ka jingïashimbynta ha kaban pynkhuid, pynitynnad bad pynbha ïa ka, ka dei ka kabu ksiar ïa ngi bad ka dei ka bynta ba donkam ha ka jingmane jong ngi. Baroh ki lah ban shim bynta.

Pynkhuid da la ka mon sngewbha hadien ka jingïalang. Hadien man ki jingïalang, ki para bangeit ki kmen ban ïatreilang ban pynkhuid ïa ka Ïing Hima. Shisien shitaïew ka don ka jingpynkhuid bajanai. U rangbah balang ne u nongïarap balang u pynïaid ïa ki kam, bad u peit ïa kiei ba ki dei ban leh. Don napdeng jong ki, ki sar, ki ñiad, ki kynther pum-pum, ki pynbeit shuki, ki pynkhuid paiñkhana, ki sait jingkhangïit, ki bret ñiut ne ki pynkhuid shabar katkum ka jingdonkam. Shisien shisnem, la buh ïa kawei ka sngi ban pynkhuid bha nadong shadong. Da kaba kynthup lang ïa ki khynnah ha ki kam bapher bapher, ngi hikai ïa ki ban burom ïa ka jaka mane jong ngi.​—Eklesiastis 5:1.

Shim bynta lada don kano kano ka jingpynbha. Man la u snem, ka don ka jingpeit bniah ïa ka Ïing Hima hapoh bad shabar. Katkum kane ka jingpeit la ju pynbha ïa ka Ïing Hima na ka por sha ka por bad kane ka ïarap ban kiar na ka jingpynlut ha kiei kiei ki bym da donkam. (2 Khronikl 24:13; 34:10) Ka Ïing Hima kaba khuid bad kaba bha ka long ka jaka kaba biang ban mane ïa U Blei. Ka jingïashimbynta ha kane ka kam, ka pyni ba ngi ieid ïa U Jehobah bad ñiewkor ïa ka jaka ba ngi mane. (Salm 122:1) Ka shnong ka thaw ka ïaroh ïa kane.​—2 Korinth 6:3.

• Balei ngim dei ban leh bym suitñiew ïa ka jaka mane jong ngi?

• Kiei ki jingpynïaid ba la buh ban pynkhuid ïa ka Ïing Hima?