Muna konso Seka dia Kintinu, Mbangi za Yave nkumbu avauka ya Nzambi besadilanga. Muna kuma kiaki, o velelesa yo vangulula Maseka ma Kintinu, i lau diampwena ye dimosi muna mambu mevavuanga muna nsambil’eto yavauka. Wantu awonso balenda kwau sala e salu kiaki.

Ukivana muna velelesa Seka dia Kintinu kuna mfoko a lukutakanu. Kuna mfoko a lukutakanu, mpangi za makala ye zamakento kuna kiese kiawonso bekuyivananga mu velelesa yo kubika mu nzaki e Seka dia Kintinu. Bevaulanga mpe ntangwa yafwana nkumbu mosi muna lumingu mu toma velelesa e Seka dia Kintinu. Nkuluntu yovo selo kia salu ofilanga e salu kiaki yo landa luludiku lwasikidiswa muna velelesa e Seka dia Kintinu. Vena ye salu yayingi ilenda salwa, ampangi balenda komba, loza e titi, sukula, kusuna yo kubika e kunda, sukula nzo zakete, sukula yovo kusuna zianela yo komba e yanzala. Nkumbu mosi muna mvu, bevaulanga e ntangwa mu vanga luveleleso lwampwena. Muna salanga kumosi yo wan’eto muna salu yayi, tukubalonganga zitisa e fulu yeto ya nsambila.​—Kimpovi 5:1.

Ukivana muna vangulula Seka dia Kintinu. Konso mvu, ampangi befimpanga yovo vav’o zaya e fulu kilenda vangululwa mu kati ye kumbazi a Seka dia Kintinu. Mu kuma kia lufimpu lwalu, mpangi belendanga vangulula Seka dia Kintinu ntangwa zawonso. Ediadi disadisanga mu lembi fwasa nzimbu zayingi. (2 Tusansu 24:13; 34:​10) E Seka dia Kintinu diavelela ye diatoma kubikwa, i fulu kiambote kia sambila Nzambi eto. Muna yikamanga e salu kiaki, tusonganga vo tuzolanga Yave ye fulu tusadilanga muna kunsambila. (Nkunga 122:1) O velelesa fulu kieto kia nsambila disivikisanga wantu muna zunga.​—2 Korinto 6:3.

• Ekuma tufwete lunga-lungila e fulu kieto kia sambila?

• Nkia nkubika zivangwanga muna velelesa e Seka dia Kintinu?