Kja yo ngumꞹ nu ja ri jmurgojme yo ri testigojme e Jehová, kuatrʼꞹnu o trju̱u̱ e Jehová. Texe yo ri jmurgojmenu ri paxꞹjme, ñe ma pje sʼodʼꞹ ri jokꞹjme ngekʼua na joo rga ñetsʼe kʼe ngumꞹ, akjanu nee e Jehová ke ra kjajme.

Ma ri jmurgojme ri paxꞹjme kʼe ngumꞹ. Ma kjuarꞹ yo reunión, yo kjuarma ñe yo kju̱ʼu̱ me mⱥji ga paxꞹji ñe trjintsiji kʼo bʼꞹbʼꞹ kja kʼe ngumꞹ. Chjꞹma chjꞹma ri juajnꞹjme na paa ngekʼua ra paxꞹjme na joo amboo ñe atrjii kʼe ngumꞹ. Xo ri trjintspijme na joo yo baño, ri trjintspijme yo trjujnꞹ, ri pechʼejme yo benrrana, ri trjintspijme yo jñeje ñe ri pozꞹjme yo tsañabʼꞹ. Na kjuarma kʼꞹ otrʼꞹ axojñi o na kjuarma kʼꞹ pjøsʼꞹ kʼo otrʼꞹ axojñi nge kʼꞹ nuu yo bʼɇpji yo ri kjagojme. Tsjɇma tsjɇma xo ri paxꞹjme xe nrra na joo amboo ñe atrjii kʼe ngumꞹ. Ri unꞹjme na bʼɇpji yo tsʼitrʼi, akjanu ra pjechiji ra mbørꞹji o ngumꞹ Mizhokjimi (Eclesiastés 5:1).

Ma pje sʼodʼꞹ kja kʼe ngumꞹ søø ra pjøsʼꞹjme ra jokꞹji. Tsjɇma tsjɇma ri nugojme na joo pje nge kʼo ya sʼodʼꞹ amboo ñe atrjii kʼe ngumꞹ, akjanu dabaditrjo ra jokꞹjme. Ri pjørꞹjme ngekʼua dya ra sʼodʼꞹ, ma dya ra kjajmekʼo, ra sʼodʼꞹjme na punkjꞹ merio ma ra jokꞹjme, ri negojme ke ra ñetsʼe na joo kʼe ngumꞹ (2 Crónicas 24:13; 34:10). Kja kʼe ngumꞹ ri pjechijme pje nee e Mizhokjimi ke ra kjajme, ngekʼua na joo ke ra paxꞹjme, ra trjintsijme ñe ra kansʼajme yo kañabʼꞹ. Ri pjøsʼꞹjme ri kjagojme yo bʼɇpjiyo ngekʼua na joo rga ñetsʼe kʼe ngumꞹ. Akjanu ñetsʼe ke me ri sʼiyajme e Jehová ñe ke me ri negojme ra jmurgojme kja kʼe ngumꞹ (Salmo 122:1). Ri kjajme texekʼo ngekʼua yo ntee ra unꞹji nguenda me na zøø kʼe ngumꞹ nu ja ri pa ⱥrgojme o Jñaa e Mizhokjimi Jehová (2 Corintios 6:3, NTD).

• ¿Pjekja ri paxꞹjme ñe ri trjintspijme kʼe ngumꞹ nu ja ri jmurgojme yo ri testigojme e Jehová?

• ¿Pje ma bʼɇpji nge yo ri kjagojme kja kʼe ngumꞹ nu ja ri jmurgojme?