Tukëʼëyë Tëjk mä yʼëxpëktë Jyobaa tyestiigëty tmënëjkxyë Diosë xyëë diʼib wäʼäts, pääty tsojkëbëts nyaʼittët wäʼäts ets tsuj yajxon. Mëj nyaxy kojëts duʼun ndundë, pes duʼuntsën ja tuk pëky nDiosmëdundë, päätyëts niʼamukë nnaybyudëkëdë.

Nnayʼawäʼänëdëbëts parëts nyajwäʼätstët ja tëjk ko jyëjpkëxyë naymyujkën. Koogoo jyëjpkëxyë naymyujkën, tajëts nnayʼawanëdë parëts nyajwäʼätstët ja tëjk. Per mä tuʼukpë sëmään nwinʼijxtëbëts tuʼugë xëë parëts yajxon nyajwäʼätstë. Tuʼugë mëjjäʼäy o diʼib pyudëjkëbë mëjjäʼäy, yëʼë diʼib tyukniwijtsëp tijaty yajtunäämp ets näʼäty yʼakmëdäjttëp tuʼugë listë extëmë: padëʼk, tëjkpoʼtk, xyoogëdë pëjy ujts; yajpoʼodëdë ijxn, unyaaybyajn; wyäʼätsëdë banyë, bentanë; yaʼëxkoʼojëdë puʼxm, ets wyäʼätsëdë jënwiin tëjkwiin. Ets naa tëgok majtskʼokën mä tuʼukpë jëmëjt yajtukniwitsë parë tukëʼëyë wyatstäʼäyët ja tëjk. Ko ënäʼkuʼunk yajtuunkmoʼoytyë, duʼun yajtukniʼʼixëdë parë twintsëʼëgëdët ja lugäär mäjëts nDiosʼawdattë (Eclesiastés 5:1).

Nnayʼawäʼänëdëbëts mä tijaty yʼaʼoyëyaʼany. Jëmëjt jëmëjt yaʼixy ja Tëjk mäjëts nʼëxpëktë, duʼun nikëjxy ets jodoty pën jap ti yʼaʼoyëyaʼany, net kyaj nëgoo ja meeny sentääbë ok tyunët (2 Crónicas 24:13; 34:10). Ja Tëjk mäjëts nʼëxpëktë, tsojkëp yajpäädët wäʼäts ets oy, yëʼë ko japëts nDiosʼawdattë. Pën nnayʼawäʼänëdëbëts parëts nyajwäʼätstët, duʼuntsën nyajnigëxëʼëktë ko ntsojktëbëtsë Jyobaa ets ko nmëjʼijxtëbëts ja lugäär mäjëts nʼawdattë (Salmo 122:1). Ets nan nëjkxëbë jäʼäy tʼoyʼixtë (2 Korintʉ 6:3).

• ¿Tikots xëmë nguentʼattë ja lugäär mäjëts nDiosʼawdattë?

• ¿Tijaty yajtuump parë wäʼäts yʼitët ja Tëjk mäjëts nʼëxpëktë?