O Nyomba yonthe ya Ũnene ĩĩtanaĩrua na riĩtwa rĩrĩtheru rĩa Mũrungu. Kwou, nĩtwonaga gũteetheria gwĩka nyomba yeetũ ĩtheri, ĩkĩonekaga bwega, na kũthithia naarĩa kũthũkangĩte bũrĩ ũntũ bwa gĩtĩĩo na bwa gĩtũmi kĩrĩ ũthaathayia bwetũ bũbũtheru. Twinthe no tũteetherie ngũgĩĩne iu.

Ĩritĩre gũteetheria ũtheru nyuma ya mĩcemanio. Nyuma ya o mũcemanio, ataana na aarĩ ba baaba nĩbagwĩragĩrua kũthithia ũtheru bũũkai kũtheria Nyomba ya Ũnene. O rĩmwe kiumia, ũtheru bũbwega nkũrũki nĩ bũthithagua. Ngũgĩ nĩbaanganagua nĩ mũkũrũ wa kĩũthũrano kana nthũmba ya ũtungatĩrĩ, mono mono bakĩthingatagĩra mũtaratara jwa mantũ jarĩa jakathithua. Kũringana na ũbatu, antũ nĩ bairitagĩra kweegera, kũthambia na kũbaanga itĩ Nyombene ya Ũnene, kũtheria na gwĩkĩra ndawa bioroone, kũthambia ndirica na bioni, gũta rũko, na kũtheria oome. O mwaka, nĩkwĩthagĩrwa na ntukũ ĩmwe kana nkũrũki ya kũthithia ũtheru bũbũnene. Twaritanĩria ngũgĩ na aana beetũ, tũkabaritana gũtĩĩa antũ arĩa tũthaathagĩria.—Mutumiiria 5:1.

Iritĩre kũthithia naarĩa kũthũkangĩte. O mwaka, Nyomba ya Ũnene nĩthithagĩrua ũteegeeri bwa mwanya ndeene na oome. Kuumania na ũteegeeri bũu, ngũgĩ ya kumenyeera nĩthithagua na wĩthĩre gwĩka nyomba ĩu ĩrĩ ĩnjega, na bũu bũgatwebania na ngarama itĩna gĩtũmi. (2 Mantu ja Karaja 24:13; 34:10) Nyomba ya Ũnene ĩntheru na ĩmenyeeri bwega nĩ antũ akwaagĩra kũthaathagĩria Mũrungu weetu. Twateetheria ngũgĩne ĩu, tũkoonania nĩtwendete Jehova na nĩtwonaga arĩa tũthaathagĩria kũrĩ gwa gĩtũmi. (Zaburi 122:1) Kinya bũu nĩ bũretaga mbica ĩnjega gĩcigone gĩetũ.—2 Akorintho 6:3.

• Nĩkĩ tontũ tũtĩbuĩri kũrekeeria antũ arĩa tũthaathagĩria?

• Nĩ mĩbaango ĩrĩkũ ĩthithagua ya kũtheria Nyomba ya Ũnene?