Khula Isalau yo Umwene yo Masaahiti a Yehova inaathoonyera ncina nowaarya na Nluku. Phimaana uhiya ukati wotheene inarenre ni inari saana ninoona ukhala iparakha yuulupale ni inanna yomaana yonswalela Yehova.

Nkavihere ukwecakweca nsalau wamalaka nkutthaano. Wamalaka nkutthaano, mayamunna alopwana ni athiyana anawiivaherera ukwecakweca Isalau yo Umwene. Nkwaha mmoca khula isumana, inaakwecakweciyaka sana-saana ni ipuwa yotheene inrukurerya Isalau yo Umwene. Humu awula nruminya o wanlokoni naahoolela uyo ntekooyo attharaka ilista yo miteko cinhala uvariya. Khula uwakati, invariya itthu inooniya wiira inaareerana toko ukhweca, ukukuttha ntthupi novathi awula urapiha nsalau, ukukuttha ntthupi noncanelani, uthotokanihaca ikhattera, ukweca ni urapiha isoworo, urapiha iloola yonsoworo, uriha ikokhola, urehereraca ijardim ni ukweca ipuwa yotheene. Khula mwaakha ninaatthenkaciya nihuku wiira ukwecakweciye wooratteene. Nlattu asaana woopanka mphantte wuukwecakweciyani, iyo inawaafuntta uhisimu nipuro ninonswaleleehu Nluku.​—⁠Eklesyaste 5:⁠1.

Mwiivaherere ukavihera ulokihaca Isalau yo Umwene. Khula mwaakha Isalau yo Umwene inaawehawehiya nhina ni vate yakhala wiira iri saana. Vano yooniyaka wiira nihaavo nipuro nihiryaaya saana, inaalokihaciya woohipica wiira meelooni uhirihakaciye nsurukhu mwinci nlattu wootepa ukanyuwaca. (2 Ikoronika 24:​13; 34:​10) Isalau yooratteliya ni yookhala saana ninkhala nipuro noophwanela unswalela Nlukweehu. Nakaviheraka miteko cotheene, ninawoonihera unfenta Yehova ni nipuro ninswaleliyaawe. (Isaalimu 122:⁠1) Ciicammo unawaakavihera atthu woona Isalau yo Umwene ukhala yooreera.​—⁠2 Akorintu 6:⁠3.

• Kontha isiyani khaninlamuliya uhiya Isalau yo Umwene inatakhalacile?

•  Impankiya isiyani wiira Isalau yo Umwene ikhale yooreeraca ukati wotheene?