Ilo aolep Im̦õn Kweilo̦k ko an Ri Kõnnaan ro an Jeova, ej wal̦o̦k ãt eo ekwõjarjar etan Anij. Kõn menin, kõmij lukkuun kõjparok Im̦õn Kweilo̦k eo amim bwe en erreo im em̦m̦an ad lale. Ilo amim bõk kun̦aam im karreo, men in ej juon jeraam̦m̦an im ej bar juon wãween me kõmij kabuñ ñan Jeova. Aolep remaroñ bõk kun̦aaer ilo men in.

Kwõmaroñ jipañ karreo ãlikin kweilo̦k. Ñe em̦õj kweilo̦k, kõrã im em̦m̦aan ro rej m̦õn̦õn̦õ in karreoik jidik Im̦õn Kweilo̦k eo. Jãn iien ñan iien, ri tõmak ro rej jipañ doon bwe en let aer karreo Im̦õn Kweilo̦k eo. Juon iaan em̦m̦aan ro me ej lale eklejia ak juon iaan ri jipañ ro ej loloorjake iien karreo kein. Ekkã an l̦oore juon laajrak kõn ta ko rej aikuj kõm̦m̦ani. Jet rej burum̦, m̦aab ak vacuum. Bar jet rej kabũñalñal, karõke im karreoik jea ko, im̦õn kapojak ko, wũntõ ko im kilaaj ko. Rej bareinwõt jol̦o̦k kõbij ko im karreoiki mel̦an Im̦õn Kweilo̦k eo. Juon alen kajjojo iiõ, ro ilo eklejia eo rej koba ippãn doon im karreoik men otemjej ilowaan im inabõjin Im̦õn Kweilo̦k eo. Kõmij bõktok ajri ro nejim bwe ren jipañ karreo. Ilo wãween in, kõmij katakin er bwe ren kwal̦o̦k aer kautiej ñan jikin kabuñ in am.​—Ekklisiastis 5:1.

Kwõmaroñ jipañ ilo jerbal ko jet ñan kõjparok Im̦õn Kweilo̦k eo. Kajjojo iiõ, rej etale men otemjej ilowaan im inabõjin Im̦õn Kweilo̦k eo. Ãlikin aer etale, renaaj kiiõ jel̦ã ta ko remaroñ kõm̦m̦ani ñan jipañ kõjparok Im̦õn Kweilo̦k eo. Ilo wãween in, eklejia eo ejjab ko̦kkure jããn. (2 Kronikel 24:13; 34:10) Ñe kõmij kõjparok im karreoik Im̦õn Kweilo̦k eo am, enaaj juon jikin em̦m̦an im ekkar ñan kabuñ ñan Anij. Ilo amim bõk kun̦aam ilo jerbal kein, kõmij kwal̦o̦k bwe el̦ap amim yokwe Jeova im kõmij kaorõk jikin kabuñ eo am. (Sam 122:1) Men in enaaj bareinwõt bõktok nõbar ñan Anij ilo bukwõn ko kõmij jokwe ie.​—2 Korint 6:3.

• Etke eaorõk bwe jen kõjparok im karreoik im̦õn kabuñ eo ad?

• Ta karõk ko kõmij l̦oori ñan karreoik Im̦õn Kweilo̦k eo?