Вашлиймаш залыш ме Иеговалан кумалаш толына, сандене тушто арулыкым кучаш тыршена. Тиде мыланна кугу чап, вет Залым ончымашым ме кумалмашын ужашыжлан шотлена. Кӧн кумылжо уло, чыланат Залым эрыктымаште полшен кертыт.

Вашлиймаш деч вара Залым эрыкташ кодына. Залым кажне вашлиймаш деч вара ме изиш гына эрыкташлан кодына. А арняште ик гана Вашлиймаш залнам сайынак эрыктена. Тиде пашам кугурак иза але служебный полышкалыше вуйлата. Тудын тыгай кагазше уло, кушто возымо, могай радам почеш Залым эрыкташ кӱлеш. Тудо иза-ака-влаклан тӱрлӧ сомылым пуа. Южышт кӱварым ӱштыт, мушкыт, пылесос дене эрыктат, пуракым ӱштыт да пӱкен радымым тӧрлатат. Весышт туалетыште дезинфекцийым ыштат, янда омса-влак ден воштончышым мушкыт да погымо куштырам луктыт. Тыгак Зал кудывечымат эрыктат. Идалыкеш ик гана ме кугу эрыктымашым эртарена. Эрыктыме пашам шуктымына годым йоча-влакланат южо сомылым пуэна. Туге ме нуным кумалме верым аклаш туныктена (Экклезиаст 5:1).

Ачалаш полшена. Кажне ийын ме тергена, кӱлеш мо Зал кӧргыштӧ але тӱжвалне иктаж-мом ачалаш. Шке жапыште ачалымаш пӧртнам шуко жаплан арален кодаш полша да шуко оксам огеш нал (2 Летопись 24:13; 34:10). Вашлиймаш зал, кушто чыла арун да сайын ыштыме, мемнан Юмыланна кумалашлан йӧрышӧ вер улеш. Залым эрыкташ да ачалаш полшымына дене пагалымашым ончыктена тудо вер деке, кушто Иеговалан кумалыт. Тыгак тиде Иеговам йӧратымынам ончыкта (Псалом 121:1). А эше ару да мотор Вашлиймаш зал весе-влакын ушыштышт сай шарнымашым кода (2 Коринфян-влаклан 6:3).

• Вашлиймаш залым молан сайын ончаш кӱлеш?

• Кузе ме Вашлиймаш залыште арулыкым кучена?