Sejse Kali kampa Mosentiliaj iTaixpantijkauan Jiova kiixnextia iyektik tokayit Dios, yejua ika moneki tikpiaskej chipauak, maj kuali moita uan maj amo teyi kipolo. Tikitaj kemej se tatiochiualis, ta nejin se taman tein motelneki tein ika tikueyichiuaj Dios, uan tinochin uelis titapaleuiskej.

Maj titapaleuikan itech tachipaualis keman tami tonechikol. Satepan keman tami sejse nechikol, nochin tokniuan ika miak pakilis tapaleuiaj maj motachipaua sayoj kampa moneki; miakpa itech xiuit motachipaua okachi ika nejmachkayot. Se tayekankej oso se tapaleuijkej kiixyekanaj nejin tekit, uelis kitojtokas tein kijtoua itech se amat tein moneki mochiuas: tachpanaskej; kichipauaskej piso; kichipauaskej uan kinyektaliskej ikpalmej; kinchipauaskej nekalauiloyamej; kichipauaskej teskamej; kitamotaskej tajsol, uan tachipauaskej uan tayektaliskej kalixpan. Sepa itech xiuit moixtalia okachi kuali motachipauas kalijtik uan kalampa. Keman tikinmakaj seki tekimej akin konemejok, tikinnextiliaj maj kipoujkaitakan kali kampa tikueyichiuaj Dios (Eclesiastés 5:1).

Maj titapaleuikan keman moyektalis tein monekis. Nochi xiujmej moita toni kipoloua taijtik uan kalampa kampa timosentiliaj, ijkon moita toni uelis moyektalis uan ijkon maj kuali yeto uan satepan amo monekis okachi tomin (2 Crónicas 24:13; 34:10). Se Kali kampa tiMosentiliaj uan tein kuali moita yekmelauj kinamiki maj ompa tikueyichiuakan toTajtsin Dios. Komo titapaleuiaj maj kuali moita, tiknextiskej ke tikpoujkaitaj uan ke tiktasojtaj Jiova (Salmo 122:1). No ijkon uelis toka kuali tajtoskej okseki taltikpakneminij (2 Corintios 6:3).

• ¿Keyej amo uelis tiksenkauaskej kali kampa tikueyichiuaj Dios?

• ¿Toni tekimej tikchiuaj uan ijkon moita chipauak Kali kampa tiMosentiliaj?