Nyumba jese jo Umambo jo Zvapupu zva Jehovha jinotora zina rakacena ra Jehovha. Kutora rutivi mu kuicenesa, kuiita inokhombijika, no kuisia no mavonekero aushoni, i mucena zve idivi guru maningi ro kunamata kwedu kwakacena. Vese vangatora rutivi.

Vazvipiri pa kupera ko musongano vangaicenesa. Pakupera ko musongano umwe nga umwe, hama no ampsaji ngo mudakaro wese vangaita ukhirini kuti varongeje Nyumba yo Umambo. Kamwe pa bviki, ukhirini hukuru hunoizwa. Mukuru umwe kana mubatiri anoshandira anoronga basero, kazinji eciteverera nda-nda-nda yo zvinoda kuizwa. Zvinofira pa zvinodiwa, muzvipiri umwe nga umwe angazvipira ku psaira, kusuka pasi, ku pukuta kana kupumbhuja bukuta, kurongeja zvigariro, kusuka pomwe no kufafaizira mutombo mu zvarota, kusuka majanera, kupseja njakani kana kucenesa kunja zve kutemerera no kurimira maruva. Kamwe kana kazinji pa gore, panorongwa njiku imwe yo kuita ukhirini hwa vese. Ngo kubatanijavo vana vedu mu mabasa amweni, itusu tinovajijisa kureremeja ndau yedu yo kunamatira.—Mucumaeri 5:1.

Kujipira kuita zvinodika kunasirira. Gore ngo gore, kupopora kwakaperera kunoizwa pa Nyumba yo Umambo, mukati no kunja. Zvecicijikira pa kupopora uku, basa ro kunasirira nguva jese rinoithwa kuitira kusia nyumba yakavanga, zvecibesera kujivirira kumosha mare mahara. (2 Kronike 24:13; 34:10) Kucenesa no kusia yakanaka Nyumba yo Umambo zvinoreremeja ndau yatinonamatira Mwari wedu. Ngo kubatira pamwepo tinotatija kuva kwedu phedo na Jehovha zve tinoreremeja ndau yedu yo kunamatira. (Nduyo 122:1)Izvi zvinobara mavonero akanaka pa ndharaundha.—2  VaKorinto 6:3.

• Ngenyi atidikani kureja-reja patinonamatira?

• Urongwa hwapi hunoithwa kuitira kuti Nyumba yo Umambo irambe yakacena?