Da Lo-lengɔ Gbia zu tɛ Atɛmwɛ tɛ Yehova ndo yu ili Nzapa mɛ santo. Ni la, e ndo hũ ya yɔngɔ ya da ni, lɛkɛngɔ da ni, batangɔ ni adu nzɔ̃ tangɔ li gɛrɛ, adu nga kɔi ti kwa ti sambela tɛ e mɛ santo. E zu e lengbi ti hɛngɔ ti e na kwa ni.

Du dã ti lɛkɛngɔ Da Lo-lengɔ Gbia na pɛ bombi. Na pɛ bombi kɔi kɔi, ayata kɔli na ayata wali ndo sepala lɛkɛngɔ Da Lo-lengɔ Gbia ya adu vulu ni. Fani kɔi na ya pɔsɔ kɔi, ando lɛkɛ Da Lo-gbia na seni. Biazo kɔi bere wa zangɔ na kwa kɔi ndo ba se kwa ni, lo ndo ba ngbolinɔ ti kwa mɛ alɛkɛ. Se alengbi, ayata mɛ ndo li kwa na se bɛ la ndo yɔ ya da ni, ndo kpo ya da ni na ngu, ndo mbo mbo amɛsa na akiti nga na ando ti dungɔ na ni, ala ndo lɛkɛ akiti, akpo lɛ pula nga na tala tala, ndo kpo da kabinɛ na da ngu, ala ndo hãna ada nvɛ̃nɛ, ala ndo sa goga ka ndo mɛ alengbi, ala ndo yɔ ya gbagba na pɛ gbagba kwɛ́. Fani kɔi na ya buru kɔi, ando sala bi kɔi ti lɛkɛngɔ na Da Lo-lengɔ Gbia nzɔ̃ni bwaí nvɛ̃ni. Se e hɛ ayangambi tɛ e mbɛni kwa ti lɛkɛngɔ na Da Lo-lengɔ Gbia ko, e na hangɔ na ala ya ala tɔndɔ ndo tɛ e ti sambela.​—Mosakoli 5:1.

Se ye kɔi gbɛ̃ ko, mɔ lengbi ti hɛ̃́ngɔ ti mɔ dazu se mɔ hĩnga lɛkɛngɔ ni. E ndo ba Da Lo-lengɔ Gbia tɛ e na seni ya buru kɔi kɔi, ka ya ni na ka gegi ni. Se e li ngaso lá kwɛ́ ko, e na batangɔ Da Lo-lengɔ Gbia nzɔ̃ni, ta e na gbɛ̃ngɔ faranga gba ma. (2 Ntango 24:13; 34:10) Da Lo-lengɔ Gbia ko la alɛkɛ ni vulu ni ndo bata nga ni na seni adu ndo mɛ alengbi ti vɔrɔngɔ na Nzapa tɛ e. Se e hɛ ti e na lɛkɛngɔ ndoni ko, e na fangɔ ya e ndo ye Yehova nga na ndo tɛ e ti sambela na bɛ e kɔi. (Nzembo122:1) Ni ndo to nga azi ya ala gonda sambela tɛ e.​—2 Kɔrinto 6:3.

• Ta e lengbi ti tongɔ sasa na lɛkɛngɔ ndo ti sambela tɛ e ma na lo nɛ?

• Aye mɛ e lɛkɛ ti batangɔ na Da Lo-lengɔ Gbia vulu ni nɛ?