Nochi Kajli kan Monechkowaj yej Tajto̱lmoya̱waj de Jehová kiwi̱ga ito̱ka̱ Dios, iní̱n se̱ to̱ka̱ yej pux chipaktiʼ. Inó̱n iga moneki matitapale̱wikan iga iní̱n kajli maono chipaktiʼ wan mane̱si ye̱kti. Iní̱n se̱ ye̱kti tekipano̱lis kan nochi wel titapale̱wiáj, matikitakan ken se̱ tekipano̱lis iga Dios.

Matitapale̱wikan iga matitapojpowakan kua̱ matami totanechko̱lis. Kua̱ tami tanechko̱lis, tokni̱wan kisenpojpowaj kajli kan monechkowaj wan se̱ biáj cada semana kiye̱’pojpowaj. Se̱ yej tayaka̱na o se̱ siervo ministerial kijliáj te̱ wel kichi̱waj: matachpanakan, makipajpakakan piso; makipojpowakan wan makiye̱ʼtali̱kan asiento; makipajpakakan baño, makipojpowakan ventanas wan espejos; makitajkalikan tasol, wan matachpanakan pan patio wan makiye̱’tali̱kan tejté̱ siga sosolijtoʼ. Motapejpena se̱ día cada xiwiʼ iga makipojpowakan nochi iní̱n kajli kan monechkowaj. Matikijli̱kan kokone̱tsitsin iga matapale̱wikan, ijkí̱n tikne̱xtiliáj iga makiye̱ʼitakan kan timonechkowaj (Eclesiastés 5:1).

Matitapale̱wikan iga matitaye̱’tali̱kan. Cada xiwiʼ sekin tokni̱wan kitaj kén onoʼ taijtiʼ wan fuera de kajli kan timonechkowaj, ijkí̱n tikmatij te̱ kipolowa wan te̱ matikye̱ʼtali̱kan iga amo matikyokatamikan tomin (2 Crónicas 24:13; 34:10). Se̱ Kajli kan Timonechkowaj yej onoʼ ye̱kti wan ayá̱ sokiyoj, kiweyichi̱wa to-Dios. Si titapale̱wiáj iga matikye̱’tali̱kan, tikne̱xti̱skej iga tikye̱’itaj wan iga pux tiknekij Jehová (Salmo 122:1). Wan no̱, pan toa̱ltepe̱ʼ yawij tajto̱tij ye̱kti de tejeme̱n (2 Corintios 6:3).

• ¿Té íga moneki maye̱ʼono Kajli kan Timonechkowaj?

• ¿Te̱ tekipano̱lis mochi̱wa iga Kajli kan Timonechkowaj maono ye̱kti?