Ero sambua Nahia Gorahua Zamaduhu’ö Yehowa tesura döi Lowalangi Ni’amoni’ö. Börö da’ö, na fao ndra’aga ba wondrorogö, ba wangehao Nahia Gorahua mbanua Lowalangi, no sambua halöwö si sökhi khöma da’ö ba sambua lala ba wamosumangema Lowalangi. Fefu ndra’aga falulu fohalöwö.

Matehegö ginötöma ba wangehao nahia na no awai gangowuloama. Ero aefa gangowuloa, ato ndra talifusö lafuli lahaogö ba lafa’anö nahia gorahua. Sakali ba zi samigu lahaogö nahia gorahua. Samösa zatua sokubaloi mazui enoni zondrönia’ö ba wamalua fefu ngawalö halöwö, si to’ölönia lago’ö fefu zi no tefakhoi. La’odaligö hadia halöwö, so zamözini, so zanasai salo, so zama’anö kurusi, so zangehao wese, so zangehaogö sörömi, sanibo’ö sasao, samözini olayama. Si lö’ö-lö’önia sakali ba zi döfi lahaogö fefu Nahia Gorahua Mbanua Lowalangi. Mafaogö ndraonoma wohalöwö ba wamamaha ya’ira ena’ö böi lata’unöisi nahia wamosumangema Lowalangi.—Zangombakha 4:17. (Sura Ni’amoni’ö)

Omasiga matolo na so zinangea mufazökhi. Sakali ba zi döfi, lafareso fefu Nahia Gorahua Mbanua Lowalangi he bakha he baero. Aefa da’ö, lö aefa-aefa larorogö ena’ö lö tekiko, faböi ebua gefe ni’oguna’ö. (II Nga’ötö 24:13; 34:10) Nahia Gorahua Mbanua Lowalangi si lö ta’unö ba si no muha’ogö ya’ia da’ö, nahia sinangea ba wamosumange Lowalangima. Börö me fao ndraʼaga wohalöwö, daʼö zangoromaʼö wa maʼomasiʼö Yehowa ba maʼosinangegö nahia gangowuloama. (Zinunö 122:1) Sökhi göi ba wamaigi niha tanö bö’ö.—II Korindro 6:3.

• Hana wa marorogö nahia wamosumangema Lowalangi?

• Hadia nifalua ba wangehaogö Nahia Gorahua Mbanua Lowalangi?