Sapa Huasi tantacunasmanta Jehóvap sutinta apan, chayraycu alli pichascka y arreglascka tianan tían. Chayta ’ruayta nockaycúpaj suj privilegiu can imaraycu chaypi Yayát adoraycu, y túcuy yanapayta atiycu

Ofrececunaycu tían picháypaj tantacunas puchucaptin. Chaymanta sapa tantacuna puchucaptin, congregaciunmanta cajcuna ofrececuncu Huasít tantacunasmanta picháypaj; Suj punchau semanapi panas y huauckes tucuyta allít pichancu. Suj huaucke capacitascka o huaucke capacitascka yanapajcuna organisancu llámcay ’ruácoj ’risckanmanta pichayta, regayta, fregayta o mayllayta pisosta, sillasta ashpanta sorckopuyta y acomodayta; bañusta allít mayllayta y desinfectayta; ventanasta y espejusta mapanta allít sorckopuyta; basurát sorckoyta y pichayta túcuy maypi mapa tían ucunmanta y aanmanta. Suj punchau huatapi organisancu tucuyta allít picháypaj y allichayta. Huaasta suj llámcay ckocuyta ancha súmaj can, chayna yachachicuycu ima respetanancu tían Yáyap Huasinta, maypi Yayát adoraycu (Eclesiastés 5:1).

Huasita tantacunasmanta allichayta yanapanaycu tían. Túcuy huatas Huasita tantacunasmanta allít revisancu ucunmanta y aanmanta ckaáypaj maypi allichayta chusan, chayna alli allichascka tianánpaj y mana ashca gastus ’ruacunánpaj astaan ñauckeman (2 Crónicas 24:13; 34:10). Suj Huasi tantacunasmanta alli pichascka, allichascka y ordenascka Yayát honra ckon. Si ofrececuycu Huasita tantacunasmanta picháypaj, ckaachiycu aica importaaycu y aicata Jehovát munaycu (Salmo 122:1). Nátaj maypi causaycu gente allít ’rímaj ’rin (2 Corintios 6:3).

• ¿Ímaj mana atiycu descuidayta Huasít tantacunasmanta maypi tantanacuycu?

• Huasi tantacunasmanta alli pichascka tianánpaj, ¿ima llámcay ’ruacun?