Pro khera, kaj pes zdžan le Jehovaskere svedki, o manuša šaj dikhen pisimen le Devleskero svato menos. Vašoda kamas, kaj ada kher te el čisto, šukar a mište te dičhol avral, bo aleha thiš ašaras le Devles. Ko kamel šaj pomožinel, kaj avka te el.

Ko kamel, šaj pal o zhromažďeňe pomožinel te pratinel. Pal dojekh zhromažďeňe o phrala the o pheňa rado pratinen, kaj ada kher te el čisto. Jekhvar andro kurko hin bareder pratišagos, pre savo dodikhel o staršis abo o pomocno služobňikos. On pes snažinen te ľikerel le pokinendar, sar te pratinel. O phrala the o pheňa keren oda, so kampel: šulaven, khosen e podlaha, visavinen, khosen o prachos, rovňinen o stolki, pratinen o zachodi, khosen o oblaki, o gendala čiže zrkadla, čhiven avri o šmeci andre bedňa. Te kampel, ta pratinen the avral pašal o kher. Jekhvar andro berš pes kerel baro pratišagos. Pomožinen the amare čhave. Aleha len sikavas, kaj peske te važinen o than, kaj služinas le Jehovaske. (Kazateľ 5:1)

Šaj pomožinel sako, te kampel vareso te prikerel. Sako berš pes ode kerel andral the avral bari kontrola. So kampel, pes ode prikerel. Ada pomožinel, kaj te na džal but love pro opravi. (2. Paralipomenon 24:13; 34:10) Čisto the šukar kher, kaj pes zdžan le Jehovaskere svedki, presikavel e paťiv le Devleske. Aleha, sar pes starinas pal ada kher, sikavas, hoj hin pašes paš amaro jilo o Jehovas the o than, kaj leske služinas. (Žalm 122:1) Pal ada šaj o manuša dikhen, savo hino le Jehovaskero ľudos. (2. Korinťanom 6:3)

• Soske na kamas te zamukhel o kher, kaj služinas le Devleske?

• So pes kerel prekal ada, kaj andre ada kher te el furt čisto?