E i nā Fale o Hauniga a Molimau a Ieova te igoa paia o te Atua. Ko tēnā la, e lagona e ki matou te fai o he vaega i te teu mamā o te fale, ke mata mamalu, ma te fakalelei o te tulaga, e kavea ma he avanoa fakapito ma he vaega tāua o te matou tāpuakiga paia. E mafai ke fai he vaega a nā tino uma.

Ke ofo atu ke teu mamā kāfai kua uma he hauniga. I te fakaikuga o hauniga uma e fiafia nā uho ma tuafafine oi teu mamā te Fale o Hauniga. I nā vaiaho takitahi, e fai he teuga fale mamafa. Ko he toeaina pe ko he kaukauna fehoahoani e fakamaopoopo te galuega, e mahani oi mulimuli ki he lihi o mea e fai. E fakalagolago ki nā manakoga, e ofo atu nā tino takitahi ke halu, mopu, fakaaogā te mahini miti pefu o te fola, polehi nā mea, fakahako nā nofoa, fakamamā ma fakatapē nā hiama i nā tafatafa, fufulu nā fāmalama ma nā fakaata, tiaki te lapihi, pe fai ni fakamamā i fafo ma te lotoā. E fakatahi i te tauhaga, e filifili ai he aho ke fai he fakamamā lahi. Mai te fakaaofia o a matou tamaiti i iē tahi tiute, e akoako ki latou ke fakaaloalo ki te nofoaga e fai ai a matou tāpuakiga.​—Failauga 5:1.

Ke fehoahoani atu kāfai e fia fai ni fakafou. I tauhaga uma, e fai ai he ahiahiga māeaea i te Fale o Hauniga, i loto ma fafo. E fakavae i te ahiahiga tēnei, e fai nā galuega tauhi mahani pe lelei te tulaga o te fale, e fehoahoani ki te kalofia o te fakatau ki ni mea e hē fofou ki ei. (2 Nofoaiga a Tupu 24:13; 34:10) He Fale o Hauniga e mamā ma tauhi lelei e kavea ma he nofoaga taulia ke tāpuaki ki tō matou Atua. Ko te fai o he vaega i te galuega tēnei, e fakaalia te auala kua tafapili atu o tatou loto ki a Ieova ma te tatou nofoaga o tāpuakiga. (Halamo 122:1) E fai foki he fakailoga lelei ki te nuku.​—2 Kolinito 6:3.

• Aiheā e tatau ai ke tauhi lelei te matou nofoaga mo tāpuakiga?

• He ā nā fakatulagaga kua fai ke teu mamā te Fale o Hauniga?