N’anda zyaBwaami zyaBakamboni baJehova zyoonse zilaa zina lyaLeza lisalala. Nkikaako, tulimvwa kuti kubelekelaamwi katusalazya n’anda eeyi kuti kilangika kabotu aakwiibambulula, ncilongezyo. Mulimu ooyu njiinzila imwi iisalala yakukomba Leza. Woonse muntu ulakonzya kutola lubazu.

Niwamana muswaangano lipede kumulimu wakusalazya. Niwamana muswaangano umwi awumwi, bakwesu abacizi cakubotelwa balabona kuti basiya N’anda yaBwaami kilimucimo cilikabotu. Mumviki imwi ayimwi N’anda yaBwaami ilasalazigwa cakulomya. Mwaalu naa mubelesi ubelekela uleendelezya mulimu ooyu katobelezya zyeelede kucitwa. Kweendelana azintu zyeelede kucitwa, bamwi basilikupeda balayayila, balakolobba, balakunkumuna lusuko, naa kusalazya zimbuzi, balasalazya magilazi, balasowa dooti akuyayila lubuwa. Lumwi mumunyaka, buzuba bulabikwa bwakusalazya cakulomya. Kwiinda mukupa bana zimwi zyakucita, tubayiisya kuti balemeke busena bwesu bwakukombela.​—Mukambausi 5:1.

Lipede kukugwasilizya kufumbwa ayandika kuyakulula. Munyaka amunyaka N’anda yaBwaami ilalingulwa mukati aanze. Kweendelana azintu nzibajana mukulingula ooku, mulimu wakubambulula ulacitwa kuti kayiboneka kabotu, alimwi kucita oobu ciindi coonse kugwasya kuti kutabelesegwi mali inji. (2 Makani 24:13; 34:10) N’anda yaBwaami iiboneka kabotu, mbusena busalala bwakukombela Leza wesu. Kwiinda mukutola lubazu mumulimu ooyu, tutondeezya kuti tulamuyanda Jehova akuti tulabikkila maanu masena eesu aakukombela. (Intembauzyo 122:1) Alubo eezi zibasungwaazya loko bantu bamucilawo.​—2 baKorinto 6:3.

• Nkaambo nzi nitweelede kububikkila maanu busena bwesu bwakukombela?

• Mabambe nzi abikkwa kutegwa N’anda yaBwaami kiisalala?