Hinkwatu Tiyindlo ta Mfumu ta Timboni ta Yehovha ti rhwala vito la kukwetsima la Xikwembu. Hi mhaka leyo, hiswi teka kuli xiyenge xa lisima xa wugandzeli la hina kuyendla swaku ti tshama ti basile ni kuva ka xiyimo xa xinene. Hinkwerhu hinga pfunisa ka mhaka leyo.

Hi kupfunisa ka ntirho wa kubasisa loko mintlhanganu yi hela. Vhiki ni vhiki loko mintlhanganu yi hela, hi kuswi rhandza vamakwerhu hinkwavu va basisa nyana Yindlo ya Mfumu swaku vayi siya nayi tshamisekile. Kutani kan’we hi vhiki kuyendliwa wubasisi lalikulu. Kulangiwa doda kumbe mupfunisi wa bandla swaku a rhangela ka ntirho lowu naswona hi ntolovelo a tirhisa xiyimiso lexi kombisaka leswi faneleke swi yendliwa. Hikuya hi xilaveko lexinga kona, van’wana vangaha pfunisa ka kukukula, kulimpa hansi, kuphuhuna wuthulu, kululamisela switulu, kubasisa swikoti ni majanela, kuya diba nsila, kubasisa handle ka Yindlo ya Mfumu kumbe kuhlayisa jardim. Nakambe kulangiwa siku lin’we hi lembe swaku kuyendliwa wubasisi la kuhelela. Loko vana va hlanganyela ka mintirho ya kufana ni leyi, leswo swiva djondzisa kuhlonipha ndhawu leyi hi gandzelaka ka yona. — Eklesiasta 5:1.

Hi kupfunisa ka kulunghisa. Lembe ni lembe Yindlo ya Mfumu yi kambeliwa kahle, handle ni phakati ka yona. Hi mhaka ya kukambela loko, a Yindlo ya Mfumu yi tshamela kulunghisiwa laha kufaneleke swaku yi va ka xiyimu xa xinene. Leswo swi pumba kuluza male swinga fanelanga. (2 Tikronika 24:13; 34:10) A Yindlo ya Mfumu leyi baseke yi tlhela yi va ka xiyimo xa xinene, i ndhawu leyi fanelaka swaku hi dzunisa Xikwembu xa hina. Loko hi pfunisa ka mintirho leyo, hi kombisa ndlela leyi himu rhandzaka ha yona Yehovha ni kuhlonipha ndhawu leyi himu gandzelaka ka yona. (Tipisalema 122:1) Nakambe leswo swi yendla swaku vanhu va le mugangeni wa hina vahi hlonipha. — 2 Vakorinto 6:3.

• Hi mhaka muni kunga fanelanga kuva ni wufuta ka ndhawu leyi hi gandzelaka ka yona?

• Hi wahi malulamiselo lama yendliwaka swaku Yindlo ya Mfumu yi tshama yi basile?