Ua mairihia te mau Piha a te Basileia atoa a te mau Ite no Iehova i te iˈoa moˈa o te Atua. E fanaˈoraa taa ê ïa na matou te tamâraa, te faaneheneheraa e te atuaturaa i te reira. E tuhaa faufaa atoa o ta matou haamoriraa moˈa. E nehenehe te taatoaraa e apiti mai.

Tamâraa ia oti te putuputuraa. Ma te oaoa e tamâ rii te tahi mau taeae e tuahine i te Piha a te Basileia ia oti te putuputuraa. Hoê taime i te hebedoma, e ravehia te tahi atu tamâraa. Na te hoê matahiapo aore ra tavini tauturu e faanaho i te ohipa tei tapurahia. Ia au i tei hinaaro-mau-hia, e purumu e e taahu te mau rima tauturu. E faanaho atoa i te mau parahiraa, tamâ i te vahi haumitiraa, te hiˈo, na rapaeau, te aua, aore ra e faarue i te pehu. E faataahia hoê mahana i te mau matahiti atoa no te hoê tamâraa rahi. Te haapii nei matou i ta matou mau tamarii ia faatura i ta matou vahi haamoriraa ma te horoa ˈtu i te tahi mau ohipa e rave.—Koheleta 5:1.

Apiti i te atuaturaa. I te mau matahiti atoa, e hiˈopoahia te rotoraa e te rapaeauraa o te Piha a te Basileia. Ia au i te reira e atuatu-tamau-hia ˈi te Piha, a ore atu ai te moni e mâuˈa. (Paraleipomeno 2, 24:13; 34:10) E vahi tura te hoê Piha a te Basileia mâ e te atuatu-maitai-hia no te haamori i te Atua. Ta matou ïa e haapao maite nei, ei faaiteraa i to matou here ia Iehova e haafaufaaraa i ta matou vahi haamoriraa. (Salamo 122:1) E maere atoa te taata.—Korinetia 2, 6:3.

• No te aha matou e atuatu noa ˈi i ta matou vahi haamoriraa?

• Eaha tei faanahohia ia vai mâ noa te Piha a te Basileia?