26 КИЧЭЭЛ
Хурал залы дээш канчаар сагыш човап турар бис?
Бистиң Хурал залдарывыс Иеговага тураскааттынган, ынчангаш ону чогуур байдалга тудары биске улуг алдар-хүндү-дүр. Хурал залдарын аштаары биле хандырары — ыдыктыг бараалгалывыстың чугула кезээ-дир. Аңаа шупту күзелдиг улус киржип болур.
Хурал соонда ашталга кылыры-биле артып каар бис. Ужуражылга соонда-ла Хурал залынга чиик ашталга болур. А неделяда чаңгыс катап зал хынамчалыг аштап-арыглаттынып турар. Удуртукчуларның азы дузалакчыларның кайы-бирээзи, ашталга удуртулгазынга даянып алгаш, даалгаларны үлеп турар. Колдуунда-ла ха-дуңма шаланы ширбип, чуп, пылесостап, доозунун чүлгүп, сандайларны деңнеп, арыгланыр черлерни чуп-арыглап, көрүнчүктерни болгаш эжиктерни чүлгүп, бокту үндүрүп, херим иштин аштап турар. Эвээш дизе-ле, чылда чаңгыс катап улуг ашталга кылдынып турар. Бичии уругларны база ашталгага киириштирип тургаш, ужуражылга эртип турар черлерни хүндүлээрин өөредип турар бис (Экклесиаст 4:17).
Септелгеге дузалажып турар бис. Чыл санында-ла Хурал залының ишти-даштының хыналдазы эртип турар. Доктаамал хайгаарал залды эки байдалга тударынга болгаш артык чарыгдалдарны кылбазынга дузалап турар (2 Чылдар 24:13; 34:10). Шупту чүвези чогуур деңнелге ажылдап турар, арыг-силиг Хурал залы — бистиң Бурганывыска чүдүүр төлептиг чер-дир. Залдың ажаап-хандырарынга болгаш септелгезинге киржип тургаш, Иеговага ынаавысты база ооң адын эдилеп турар черинге хүндүткелдиг хамаарылгавысты көргүзүп турар бис (Ырлар 121:1). Оон аңгыда чараш, арыг-силиг Хурал залы долгандыр улустуң сагыш-сеткилинге кирип, эки салдарны чедирип турар (2 Коринфичилерге 6:3).
-
Хурал залын эки байдалга тудары чүге чугула?
-
Хурал залын арыг-силиг байдалга канчаар тудуп турар бис?