An mga Kingdom Hall han mga Saksi ni Jehova nagdadara han baraan nga ngaran han Dios. Salit para ha amon, an pagtipig hito nga limpyo, presentable, ngan aada ha maopay nga kahimtang usa nga pribilehiyo ngan importante nga bahin han sagrado nga pagsingba. An ngatanan mahimo makigbahin hito.

Nagbuboluntaryo ha paglimpyo katapos han katirok. Katapos han kada katirok, an mga kabugtoan malipayon nga nagbuboluntaryo ha paglimpyo han Kingdom Hall. Makausa ha kada semana, ginlilimpyohan ito hin mas maopay. Usa nga tigurang o ministeryal nga surugoon an nangunguna hito. Kasagaran nga may ginsusunod hiya nga checklist han mga buruhaton. Depende ha panginahanglan, an iba nagsisiphid, nagma-mop o naglalampaso, nagtatrapo, nag-aayos han mga lingkoran, nagdi-disinfect han mga kasilyas, naglilimpyo han mga bintana ngan espiho, naglalabog han basura, o naglilimpyo han palibot han Kingdom Hall. Nagkakaada liwat kami general cleaning hin diri maminos usa ka beses kada tuig. Hini nga mga buruhaton, igin-uupod namon an amon mga anak. Hito nga paagi, natututdoan namon hira nga pabilhan an amon lugar han pagsingba.—Eklesiastes 5:1.

Nabulig ha mga kinahanglan mintinaron. Kada tuig, detalyado nga gin-iinspeksyon an sulod ngan gawas han Kingdom Hall basi matipigan ito ha maopay nga kahimtang, regular nga mamintinar, ngan malikyan an diri kinahanglanon nga gastos. (2 Kronikas 24:13; 34:10) Tungod kay ginagamit ha pagsingba ha Dios, takos ito tipigan nga limpyo ngan namimintinar. Pinaagi ha pakigbahin hini nga buruhaton, amon iginpapakita nga duok gud ha amon kasingkasing hi Jehova ngan an amon lugar han pagsingba. (Salmo 122:1) Naghahatag liwat ini hin maopay nga impresyon ha komunidad.—2 Korinto 6:3.

• Kay ano nga ginmimintinar namon an amon lugar han pagsingba?

• Ano nga mga kahikayan an amon ginhihimo ha pagtipig han Kingdom Hall nga limpyo?