Nyumba ja Ucimwene jilijose ja Mboni sya Yehofa gali malo ga Mlungu. M’yoyo, tukusawona kuti uli upile wetu, kukamucisya nawo masengo gakusamalila nyumba kuti jiwoneceje cenene, soni kulinganya mwamujonasice. Kutenda yeleyi kuli mbali jakulambila kwetu. Wosope mpaka akamucisye nawo.

Akamucisye nawo masengo gakuswejesya pambesi pamisongano. Pambesi pamisongano, abale ni alongo akusaŵa ŵakusengwa kusamalila pa Nyumba ja Ucimwene. Kamo pamlungu uliwose pakusaŵa masengo gakusamalila cenene pa Nyumba ja Ucimwene. Jwamkulungwa jwa mumpingo kapena jwakutumicila jwakamucisya ni jwakusalongolela masengogo, ndaŵi syejinji akusakuyaga yayikusosekwa kutendekwa. Mwakamulana ni yayikusosekwa, ŵandu akusalipeleka kuswejesya, kolopa, kupukuta luwundu, soni kulinganya cenene yitengu, kulinganya cimbusi, soni kupyajila pasa. Pa caka cilicose, pakusaŵa lisiku line lyakusamalila mnope pamalopo. Naga ŵanace ŵetu tukusaŵa nawo yalumo pamasengoga, tukusaŵa kuti tukwajiganya kucimbicisya malo getu gakulambilila.— Mlaliki 5:1.

Akamucisye nawo kulinganya palipose papakusosekwa kulinganya. Caka cilicose, pakusaŵa masengo gakulola malo gejonasice mkati ni kusa kwa Nyumba ja Ucimwene. Mwakamulana ni yapatileyo pakusaŵa masengo gakutamilicika gakulinganya kuti nyumbajo jiwoneceje cenene, soni kuti pakaŵaga yakonasika yejinji. (2 Mbiri 24:13; 34:10) Nyumba ja Ucimwene jakuwoneka cenene jikusaŵa malo gambone gakulambilila Mlungu jwetu. Patukukamula nawo masengoga, tukusalosya kuti tuli paunasi ni Yehofa, soni kuti malo gakulambililaga tukusagawona kuŵa gakusosekwa mnope. (Masalimo 122:1) Yeleyi yikusakamucisya kuti ŵandu ŵakumaloko atuwoneje mwakuŵajilwa.—2 Akolinto 6:3.

• Ligongo cici ngatukusosekwa kwamba kugaleka malo getu gakulambilila gali gangasamalila?

• Ana pakusatendekwa cici pakusaka kuti Nyumba ja Ucimwene jiwoneceje cenene?