Zinzo zi Kimfumu zioso zi Zimbangi zi Yehova zisonama ayi khumbu santu yi Nzambi. Diawu, tueta mona ti buela mioko mu tanina ziawu muingi ziba kitoko yidi diambu di lukumu ayi di mfunu mu tsambudulu eto. Beto boso tulenda buela mioko.

Kikininanga buela mioko mu kombula ziawu ku manima ma lukutukunu. Ku manima ma zikhutukunu zioso, baphangi zi babakala ayi zi banketo beta ba mu kiese mu tula mua bukhete mu Nzo yi Kimfumu. Lumbu kimosi mu sabala, tueta tula bukhete bufuana. Nkulutu mosi voti nsadi mu kisalu mosi weta tuadisa bisalu beni, khumbu zi wombo weta tadila liste yi mambu momo mafueti salama. Ti bufueni, baphangi bankaka beta kukivana mu kombula, sukula, pangusa bikundu ayi zimeza, sukula zinela, zivitre ayi bikabini, loza kheni ayi tula bukhete va nganda ayi ku khati luphangu. Mu mvu, tueta sobula lumbu kimosi voti viokila mu tula bukhete bu mbotembote ku Nzo yi Kimfumu. Tueta vana bana beto mua bisalu mu diambu di kubalonga bazitisa buangu kieto ki tsambudulu.—Mpovi 5:1.

Buela mioko enati yilombolo mu bongisa kima kimosi kibebidi. Kadika mvu, tueta tala mbotembote Nzo yi Kimfumu yeto, yiba mu kati voti ku nganda. Yawu yeta tusadisa tubongisanga ziawu thangu zioso mu diambu di tanina ziawu mbote ayi tubika bebisa zimbongo phambaphamba. (2 Lusansu 24:13; 34:10) Nzo yi Kimfumu yo yivedila ayi yo yitanunu mbote yidi buangu kifueni mu kembisa Nzambi eto. Ti tulembo buedi mioko mu kisalu beni, matumonisa ti tutidi Nzambi eto, Yehova, ayi buangu kieto ki tsambududulu. (Nkunga 122:1) Mayi tula diaka ti batu bakumisa tsambudulu eto.—2 Kolinto 6:3.

• Bila mbi tulendi tula ko lueya mu diambu ditadidi bukhete va buanga kieto ki tsambudulu?

• Zikhubukulu mbi zibakini mu tanina Nzo yi Kimfumu yeto?