Cada junpʼéel u Najil Reino yaan tiʼ u j-jaajkunajoʼob Jéeobaeʼ ku tsʼáaik kʼaj óoltbil u kiliʼich kʼaabaʼ Dios, le oʼolal unaj k-ilik ka pʼáatak maʼalobil mantatsʼ yéetel limpio. Jach maʼalob ka áantajnakoʼoniʼ, tumen leloʼ junpʼéel baʼax táakaʼan ichil le adoración k-tsʼáaik tiʼ Jéeobaoʼ. Tuláakloʼon jeʼel u páajtal k-áantajeʼ.

Áantajnakoʼon teʼ limpieza ku beetaʼal le ken tsʼoʼokok le muchʼtáambaloʼ. Ken tsʼoʼokok cada muchʼtáambaleʼ, le máaxoʼob ku muchʼkubaʼoboʼ ku limpiarkoʼob u Najil Reino; baʼaleʼ juntéen tiʼ junpʼéel semanaeʼ ku yilik u maas limpiarkoʼob tubeel. U suukileʼ juntúul anciano wa siervo ministerial ilik ka tsʼoʼokbesaʼak le baʼaxoʼob ku yaʼalik le lista unaj u beetaʼaloʼ, jeʼex: míis, trapear; u luʼsaʼal u polvoil le sillaʼoboʼ yéetel u kaʼa tsoʼololoʼob tubeel; u pʼoʼobol yéetel u desinfectartaʼal le bañoʼoboʼ; u pʼaʼatal limpioil le ventanaʼob yéetel le néenoʼoboʼ; u puʼulul basura yéetel u tsʼaʼabal tuláakal tuʼux unaj u yantal. Kex juntéen tiʼ junpʼéel jaʼabeʼ yaan u yilaʼal ka beetaʼak junpʼéel limpieza tiʼ tuláakal baʼax yaniʼ. U tsʼaʼabal jujunpʼéel meyaj u beet le paalaloʼoboʼ junpʼéel bix u kaʼansaʼaltiʼob u yeʼesoʼob tsiikil tiʼ le tuʼux k-adorartik Jéeobaoʼ (Eclesiastés 5:1).

Áantajnakoʼon utiaʼal u yutskíintaʼal le baʼaxoʼob kʼaʼabéetoʼoboʼ. Cada jaʼabeʼ ku yilaʼal jach baʼaxoʼob unaj u yutskíintaʼal ichil wa paachil tiʼ le u Najil Reinooʼ, lelaʼ ku beetaʼal utiaʼal ka pʼáatak maʼalob yéetel maʼ u beetaʼal nukuch xuupoʼob ken máanak kʼiin (2 Crónicas 24:13; 34:10). Junpʼéel Najil Reino limpio yéetel maʼalob u yilaʼaleʼ, jach junpʼéel maʼalob tuʼux k-adorartik Jéeoba. Wa k-áantaj utiaʼal u pʼáatal maʼalobileʼ, k-eʼesik jach k-yaabiltmaj Jéeoba bey xan le tuʼux k-adorartikoʼ (Salmo 122:1). Tsʼoʼoleʼ leloʼ ku beetik u yúuchul tʼaan maʼalob tu yoʼolal (2 Corintoiloʼob 6:3).

• ¿Baʼaxten unaj k-ilik ka pʼáatak maʼalobil mantatsʼ le tuʼux k-adorartik Jéeobaoʼ?

• ¿Baʼax meyajiloʼob ku beetaʼal teʼ Najil Reino utiaʼal u pʼaʼatal limpioiloʼ?