Guiráʼ Yoo stiʼ Reinu stiʼ ca testigu stiʼ Jiobá nápacani ti letreru ra cá lá Dios, nga runi naquiiñeʼ guiácani ne guihuinni cani galán. Guiradu zanda gacanedu para chuʼ Yoo stiʼ Reinu nayá ne nabé risaca dxiiñaʼ ca, purtiʼ laaca cayuni adorardu Dios ora rúnidu ni.

Riuʼdu listu para gacanedu guiá Yoo stiʼ Reinu ora guiluxe guendaridagulisaa. Despué de cada guendaridagulisaa, ca binni ridagulisaa riuucaʼ listu para gusiacaʼ ndaaniʼ Yoo stiʼ Reinu; ne gatigá rusiá chaahuicabe ndaaniʼ ni. Ti binnigola o ti siervu ministerial ruuyaʼ guni ca xpinni Cristu caadxi dxiiñaʼ casi gusiacaʼ, gunduubacaʼ, guni trapiarcaʼ o guni aspirarcaʼ; gusiacaʼ lu ca cosa nuu ndaaniʼ ni, guzuhuaa chaahuicaʼ banguʼ, quiʼbiʼ chaahuicaʼ bañu, gusiacaʼ ventana ne ca speju stini; chisáʼbicaʼ guixi, ne gusiacaʼ fuera de laani. Ne ribeecabe neca ti dxi lu ti iza para gusiá chaahuicabe ni. Cani jma nahuiiniʼ zanda gacanecaʼ guiá ndaaniʼ Yoo stiʼ Reinu, zacá rusíʼdidu laacaʼ guni respetarcaʼ lugar ra runi adorardu Dios (Eclesiastés 5:1).

Racanedu gaca chaahuiʼ ni. Guiráʼ iza ribeedu ti tiempu para guidúʼyadu ximodo nuu ndaaniʼ Yoo stiʼ Reinu ne fuera de laani ti gánnadu xi caquiiñeʼ gaca chaahuiʼ ne xi cayaadxaʼ gaca para chuʼni galán, pacaa jma stale zunítidu despué (2 Crónicas 24:13; 34:10). Ora nayá nuu Yoo stiʼ Reinu ne nuuni galán la? reeda gácani ti lugar risaca ra runi adorardu Dios. Pa gacanedu guiani ne gaca chaahuiʼ ni, zusihuínnidu pabiáʼ risaca lugar ca para laadu ne pabiáʼ nadxiidu Jiobá (Salmo 122:1). Ora rúnidu zacá dede ridxagayaa binni xquídxidu ora guʼyaʼ pabiáʼ sicarú rihuínnini (2 Corintios 6:3).

• Xiñee qué rusaanadu de gusiadu lugar ra runi adorardu Dios.

• Xi guiráʼ dxiiñaʼ raca para ganda chuʼ Yoo stiʼ Reinu nayá.