Baa u nyéñ boñ ngim nyiña inyu kéñbaha yi yoñ i Bibel? Baa u ngwés wan pes i kaat i tôbôtôbô, tole kôs biniigana bi mbéñge ngim mut, ngim homa, tole ngim jam ikété Bibel? Baa u ma badba ibale Bañga i Djob i nla hôla we inyu ngim jam i ntihba wemede mede? Ibale hala, wee yuuga kobot bikaat i Ndap Ane.

I gwé bisélél bilam inyu yéñ mandimbhe. Bebek le u gwé bé bikaat gwobisôna Mbôgi Yéhôva i ma pémés i hilémb hioñ. Ndi kobot bikaat i Ndap Ane i gwé libim li bikaat bi mondo. I nla ki bana nya ndi nya i ngobol i Bibel, kaat i ntoñol bibuk, ni ndôñ bikaat ipe inyu nyiña. U yé kunde i gwélél kobot bikaat i bisu ni i mbus makoda. Ibale Ndap Ane i gwé ordinater, i kei i, i mbéna bana sélél ba nsébél le Watchtower Library. I sélél i i gwé ngandak bikaat. I ntomb ki ngandak inyu gwélél. Ni yo, u nla pala yéñ ni léba biniigana bi ntihba ngim nkwel, ngim buk, tole pes kaat.

I nhôla baudu ba likoda li “Niñ yés ni nson wés.” Kobot bikaat i Ndap Ane i nla bane we nseñ ngéda u nkôôba minkwel nwoñ. I mañ ba bi pohol i ba ntjekmam nu likoda li “Niñ yés ni nson wés” nyen a ntééda kobot i. Nyen a nyoñ bitelbene le bikaat bi mondo bi kôndba mu ni le bi ba mbogok loñge. Nye malét suklu, tole nwet a niiga we Bibel, ba nla unda we lelaa u gwélél yo. Ndi, tééda le kaat yo ki yo i kobot bikaat, i nlama bé pam i Ndap Ane. Di ngwés ki yoñ yihe ni bikaat bi. Di ntand bé nlôñ to tila mu.

Bibel i ntoñol le inyu ‘léba yi i Nyambe,’ di nlama bana ngôñ i yéñ yo “kikii masôô ma nkus.” (Bingéngén 2:1-5) Kobot bikaat i Ndap Ane i nla hôla we inyu bôdôl nyiña u.

• Bimbe bisélél inyu nyiña bi yé i kobot bikaat i Ndap Ane?

• Njee a nla hôla we i tibil gwélél kobot bikaat?