A kĩ a kaso ko a ka wunɛn yɛ̃ru dukiasia Bibeli sɔɔ ro? A kĩ a yɛ̃ru sosi tireru garu sɔɔ, goo sɔɔ, ayeru garu sɔɔ ǹ kun mɛ gãanu ganu ye ya wãa Bibeli sɔɔ? Ǹ kun maa mɛ a kasu Gusunɔn Gari yu nun somi wunɛn wunanɔ gaa sɔɔ? Yen sɔ̃, kaa kpĩ a Bandu Yerun tire gbaburu bera.

Mi, sa ra sɔm yãa ni nu koo sun somi su ka kaso ko wa. Sɔrɔkudo, a ǹ Yehofan Seeda Diobun tire ni ba mɔ wunɛn barum sɔɔ kpuro mɔ. Adama, Bandu Yerun tire gbaburɔ, kaa kpara dabinu wa, baa mam kpara ni ba yara ya ǹ tɛ. Gbabu te sɔɔ, kaa maa kpĩ a Bibelin tusia dabinu wa, ka tire te ta ra gari yara tusie, ka maa sɔm yãnu ganu ni nu koo nun somi. Kaa kpĩ a tire gbabu te bera mɛnnɔ gu sere tore ǹ kun mɛ gà n kpa. Yirikisi yà n maa wãa mi, kaa kpĩ a sɔm yãa ni ba ra soku Watchtower Library wa. Watchtower Library ye sɔɔ, kaa yirikisin kpara dabinu wa, ya ku ra n maa ka kaso sɛ̃. Kaa kpĩ a kaso ko ye a tii bikiamɔ sɔɔ, ǹ kun mɛ gari yara gaa sɔɔ, ǹ kun maa mɛ Bibelin naasu gasu sɔɔ.

Ya ra maa sun somi sà n sɔmburu mɔ bɛsɛn mɛnnɔ ge sa mɔ̀ “Vie chrétienne et ministère” sɔɔ. Kaa kpĩ a tire gbabu ten sɔm yãnu loo ko mam mam à n wunɛn sɔmburun sɔɔru mɔ̀. Guro guro wi u ra mɛnnɔ ge ba mɔ̀ Vie chrétienne et ministère kparewa ra n tire gbabu ten nɔni do. Wiya u ra mɛɛri kpara kpaa ni nu yara, nu n wãa sɔɔ, kpa u wa gãanu kpuro nu n sãa dee dee gbabu te sɔɔ. Wi, ǹ kun mɛ wi u ka nun Bibelin keu mɔ̀, ben turo koo kpĩ u nun sɔ̃ɔsi mɛ kaa ka labaari ye a kasu wa. Adama, a n yɛ̃ ma tire gara kun yarirɔ Bandu Yerun di. Sa maa kĩ sa n tire ni nɛnɛ ka laakari kpa su ku yora koosi.

Bibeli ya tubusia ma sà n kĩ su Gusunɔn yɛ̃ru wa, n weenɛ sa n kpeere su ka ye kasu “nge arumani ye ya berua.” (Mɔnnu 2:1-5) Bandu Yerun tire gbabura koo nun somi a ka kaso ye tore.

• Sɔm yãa nirà kaa kpĩ a wa kaso kobu sɔɔ Bandu Yerun tire gbaburɔ?

• Warà koo kpĩ u nun somi a ka tire gbabu ten yãnu loo ko mam mam?