Yala a ka di i ye ka ɲininiw kɛ walasa ka Bibulu dɔn ka ɲɛ wa? A ka di i ye ka dɔ fara i ka dɔnniya kan tɛmɛsira dɔ kan, Bibulu kɔnɔ mɔgɔ dɔ kan, Bibulu yɔrɔ dɔ walima fɛn dɔ kan min bɛ Bibulu kɔnɔ wa? Yala i delila ka i yɛrɛ ɲininka ni Ala ka kuma bɛ se ka i dɛmɛ ka i ka jɔrɔnanko dɔ ɲɛnabɔ wa? Ni i ka jaabi ye ɔwɔ, baara kɛ ni bibiliyotɛki ye min bɛ Masaya So kɔnɔ.

Ɲininikɛ minɛn ɲumanw bɛ sɔrɔ a kɔnɔ. I b’a sɔrɔ Jehova Seerew ka gafew bɛɛ tɛ i bolo i ka kan na. Nka Masaya So bibiliyotɛki kɔnɔ, sɛbɛn kura bɔlenw tila bɛɛ, dikitiɔnɛri ɲuman kelen ni gafe dɔnnenw bɛ sɔrɔ yen ani laala Bibulu suguya wɛrɛw. Sani lajɛw ka daminɛ walima lajɛw bannen ko, kana siga k’o sɛbɛnw sɛgɛsɛgɛ. Ni o y’a sɔrɔ ordinatɛri dɔ bɛ sɔrɔ yen, i bɛ se ka baara kɛ ni Watchtower Library ye. Ale ye bibiliyotɛki ye min bɛ sɔrɔ ordinatɛri kɔnɔ, an ka gafew caman bɛ sɔrɔ a kɔnɔ, ɲininikɛ motɛri dɔ bɛ a kɔnɔ min baara ka nɔgɔn walasa i ka kunnafoni sɔrɔ barokun, daɲɛ walima tɛmɛsira dɔ kan.

Nafa b’a la Ɲɛnamaya ani waajulibaara lajɛ lakɔlidenw bolo. I bɛ se ka Masaya So bibiliyotɛki kɛ ka i yɛrɛ dɛmɛ ka i ka jɛmukan labɛn. Ɲɛnamaya ani waajulibaara lajɛ lakɔlɔsibaga de ye bibiliyotɛki ɲɛmɔgɔ ye. A b’i janto gafew labɛn cogo la ka ɲɛ a kɔnɔna na ani a b’i janto gafe kura bɔlenw ka sɔrɔ a kɔnɔ. Ale walima Seere min bɛ Bibulu kalan kɛ i kun bɛ se k’a jira i la, i mago bɛ min na, i bɛ se ka o sɔrɔ cogo min na. Nka bibiliyotɛki gafe si man kan ka bɔ Masaya So kɔnɔ. Wa, an b’an janto sɛbɛn ninnu kana tiɲɛ ani an tɛ sɛbɛnni kɛ u kɔnɔ.

Bibulu b’a ɲɛfɔ ko walasa ka “Ala dɔnniya sɔrɔ” fo i k’a ɲini “i ko nafolo dogolen.” (Ntalenw 2:1-5) Masaya So bibiliyotɛki bɛ se ka i dɛmɛ o la.

• An bɛ mun sɔrɔ Masaya So bibiliyotɛki kɔnɔ?

• Jɔni bɛ se ka i dɛmɛ ka baara kɛ koɲuman ni o bibiliyotɛki ye?