Ye wo yi na wo yé’é asu na ñyemane Bible wôé ô yaé? Ye wo yi na ô tu’a yem éfus éziñe ya Kalate Zambe, nge bôt a minlame miziñ? Nge yem avale Kalate Zambe a ne volô wo? Kele kobote bekalate ya Aba Éjôé.

A bili abui bekalate be ne volô wo. Ye ô bili fo’o bekalate bese Bengaa be Yéhôva be kuliya nkobô wôé? Kobote ya Aba Éjôé a bili bekalate bese bi ndôme kuli, to’o minkoñelane mi Kalate Zambe mife, mbamba kalate nta’ane bifia a bekalate befe be ne volô wo. Ô ne fili ya belane bekalate bete ôsusua na ésulane ja taté nge éyoñ é maneya. Nge ordinateur a ne été, éko éziñ na a bili Watchtower Library. Nnye ate a bili bekalate bese bi maneya kuli, a ne volô wo na ô yene jôme wo jeñ, éfia nge éfus éziñ.

A volô bongô be sikôlô ya ésulane bia loene na Ényiñe Kristen a ésaé nkañete jangan. Kobote bekalate ya Aba Éjôé a ne volô wo éyoñe wo kômesan ésaé jôé. Mojañ a tebele ésulan Ényiñe Kristen a ésaé nkañete jangan nnye a bili mbe’e ya kobot ate. A tabe évevé na bekalate bese be ndôme kui be tabe nta’an. Môt a ye’ele wo Mejô me Zambe, nge ñye’ele a sikôlô a ne volô wo na ô yene jôme wo jeñ. Ve da, kalate éziñ a bili ke na a kui atan. Nde fe bia yiane kôme ba’ale bekalate bete, teke tili été.

Kalate Zambe a ye’ele na nge bia kômbô bi ñyemane Zambe, bi jeñe wô ane biôm bi ne “bidima.” (Minkana 2:1-5) Kobote ya Aba Éjôé a ne volô wo mfa’a ôte.

• Ô ne koone jé e kobote bekalate ya Aba Éjôé?

• Za a ne volô wo na ô yeme belane kobote bekalate?