Ko̱bat’a kalati i kombabe̱ o Ndabo a Janea, yena yongwane̱ wa ke̱ o mapula po̱ngo̱ muwaso o bata so̱ṅtane̱ Bibe̱l. We pe̱ ná o bolane̱ mo̱ ná o kuse beteledi ońola betiledi bō̱, moto, to̱so̱ epolo Bibe̱l e makwaleano̱. Ye pe̱ ná i be̱ wa mweńa ke̱ o mabaise̱ na wame̱ne̱ nga Eyal’a Loba ye ná yongwane̱ wa jombwea mutaka mo̱ngo̱ mō̱.

I be̱n belongisan ba muwaso. Ponda po̱ o si be̱n kalati ye̱se̱ i se̱medi o Bibe̱l yena Mboṅ a Yehova i busise̱no̱, o eyem’ango̱ ya bwambo. Ko̱bat’a kalati yená i kombabe̱, i be̱n kalat’a peńa ye̱se̱ yena di sukane̱no̱ busise̱. O be̱n pe̱ oten, jita la betukwedi ba Bibe̱l, byalati ba bwam, na kalati i mongwane̱ ońola muwaso. We wonja o bolane̱ mo̱ oboso to̱so̱ ombusa ndongame̱n. O̱rdinate̱r ńe te̱ oten, we ná o bolane̱ elongisan ao ewo̱ ońola muwaso, e belabe̱ ná Watchtower Library. Y’elongisan ye ná yongwane̱ wa ná o pomane̱ kusa tem’ekwali, eyala to̱so̱ epas’a Bibe̱l ewo̱.

I mongwane̱ bautu o ndongame̱n ńa Longe̱ la kriste̱n n’ebol’a dikalo. Wena o bolane̱ mo̱ o boṅsane̱ bekwali bo̱ngo̱. Mombwed’a ndongame̱n ńa Longe̱ la kriste̱n n’ebol’a dikalo nde a be̱n mboṅ a ni ko̱bat’a kalati. Mo̱ nde a mombweye̱ nga kalat’a peńa i busisabe̱ ye oten. Nu mulēdi to̱so̱ mutombise̱ wa jokwa e ná ongwane̱ wa o so̱ nje weno̱ o wasa. Di sangame̱ne̱ o tila oteten a yi kalati, jangame̱ne̱ sabangane̱ mo̱ bwam. Di bo̱le̱ te̱ o bolane̱ mo̱, di matimbise̱le̱ nde mo̱ o ni ko̱bati.

Ná o so̱ so̱ṅtane̱ la Loba, Bibe̱l e mome̱le̱ wa ná o wase “mo̱ ka bema ba tiki.” (Minia 2:1-5) Ni ko̱bat’a kalati ńe o Ndabo a Janea, ńe ná ńongwane̱ wa.

• Njika belongisan ba muwaso di be̱nno̱ o ko̱bati ńe o Ndabo a Janea e?

• Nja ńe ná ńongwane̱ wa o bolane̱ ni ko̱bat’a kalati e?