Ndi akpama ndinam ndụn̄ọde man etetịm ọfiọk se idude ke Bible? Ndi enen̄ede ọdọn̄ fi ndifiọk n̄kpọ mban̄a akpan itie N̄wed Abasi m̀mê owo, ebiet, m̀mê n̄kpọ oro ẹtịn̄de ẹban̄a ke Bible? Mîdịghe ndi emekere m̀mê Ikọ Abasi ekeme ndin̄wam fi ọkọk mfịna fo? Edieke edide ntre, ka itie ubon n̄wed ke Ufọkmbono Obio Ubọn̄.

Mme n̄kpọ oro ẹdin̄wamde nnyịn inam ndụn̄ọde ẹdu do. Anaedi unyeneke kpukpru n̄wed Mme Ntiense Jehovah oro ẹkọn̄ọde ke Bible ke usem fo. Edi emekeme ndikụt ediwak n̄wed oro ẹsiode ndondo emi ke itie ubon n̄wed ke Ufọkmbono Obio Ubọn̄. Emekeme n̄ko ndikụt nsio nsio edikabade Bible, eti n̄wed ukabadeikọ, ye mme n̄kpọ eken oro ẹdin̄wamde fi anam ndụn̄ọde. Emekeme ndika itie ubon n̄wed oro mbemiso ye ke mbonoesop ama akasuana. Edieke kọmputa odude do, ekeme ndidi enye esịne Watchtower Library. Emi edi ndutịm kọmputa oro ọdọn̄ọde ata ediwak n̄wed nnyịn, onyụn̄ emem ndida enye nyom ibuotikọ, ikọ, m̀mê itie N̄wed Abasi ekededi.

Itie ubon n̄wed emi esinyene ufọn ọnọ nditọ ufọkn̄wed Uwem ye Utom Nnyịn Mme Christian. Afo emekeme ndida itie ubon n̄wed Ufọkmbono Obio Ubọn̄ ntịm utịn̄ikọ fo. Esenyịn Mbono Esop Uwem ye Utom Nnyịn esise aban̄a itie ubon n̄wed. Enye enyene ndikụt nte ke ẹdọn̄ mbufa n̄kpọ ye mme n̄wed do, ye nte ke ẹtịm mmọ ẹdọn̄. Enye m̀mê owo oro esikpepde fi Bible ekeme ndiwụt fi nte ekemede ndikụt se oyomde. Nte ededi, owo iyomke owo ndomokiet emen n̄wed ke itie ubon n̄wed Ufọkmbono Obio Ubọn̄ ọnyọn̄. N̄ko, nnyịn inyene nditịm n̄wed ekededi oro isiode do n̄kama, ikponyụn̄ iwetke n̄kpọ ndomokiet ke mmọ.

Bible anam an̄wan̄a ete ke man inyene “ifiọk Abasi,” ana inyịme ndidụn̄ọde nyom enye nte iyom “mme n̄kpọuto eke ẹdịbede.” (Mme N̄ke 2:1-5) Itie ubon n̄wed Ufọkmbono Obio Ubọn̄ ekeme ndin̄wam fi ọtọn̄ọ ndinam ndụn̄ọde.

• Mme n̄kpọ unam ndụn̄ọde ewe ẹdu ke itie ubon n̄wed Ufọkmbono Obio Ubọn̄?

• Anie ikeme ndin̄wam fi ada itie ubon n̄wed anam n̄kpọ nte ọfọnde?