Ko kani karaoa am kakaae bwa e aonga n rikirake am atatai n te Baibara? E kiriuriu nanom ni kan ataa nanon te kibu teuana, ke rongorongon te aomata temanna, te tabo teuana ke te bae taekinaki n te Baibara? Ke ko kan ataia bwa e kona n reke buokam man Ana Taeka te Atua ni baika ko tabeaianga iai, ke e aki? Ko kona ni kabongana te tabo n tangoboki n te Tabo n Taromauri.

A tauraoi iai bwaai n ibuobuoki ibukin te ukeuke n reirei. E bae n akea iroum booki aika boto man te Baibara aika katauraoaki irouia Ana Tia Kakoaua Iehova n oin am taetae. Ma a bati booki aika boou aika ko kona ni karekei man te tabo n tangoboki n te Tabo n Taromauri. A tauraoi naba iai Baibara aika kakaokoro aika a tia n rairaki n oin am taetae, te rikitinare ao booki n reirei riki tabeua. Ko kona ni kabongana te tabo n tangoboki imwain ao imwini bobotaki nako. Ngkana iai te kaombiuta n te tabo n tangoboki, e kona n reke iai te burokuraem ae te Watchtower Library. A bati booki aika kona ni kamanenaaki n te burokuraem aei, ao e kai reke iai te kaongora, te taeka ke te kibu ae ko kakaaea.

E manena nakoia kaain te kuura n te Botaki ae Maiura ao Ara Mwakuri ni Minita. Ko kona ni kabongana te tabo n tangoboki n te Tabo n Taromauri ibukini katauraoan am reirei. E mwiokoaki te mataniwi ibukin te Botaki ae Maiura ao Ara Mwakuri ni Minita bwa e na tararuaa te tabo n tangoboki. E riai n taraia raoi bwa a na bane n reke katotoni booki aika boou ao a baireaki raoi. E kona ni buokiko teuanne ke ane e kaira am reirei n te Baibara, ni kaota aroni kakaaean te rongorongo ae ko kainnanoia. Ma e aki riai uotakinakoani booki man te tabo n tangoboki n te Tabo n Taromauri. Ni koauana, ti kani kawakini raoi booki nako ao ti aki kani kataraabuakai ni koroboki iai n aki akaka.

E kabwarabwaraaki n te Baibara bwa ngkana ti na karekea “atakin te Atua,” ti na neneria bwa “kaanga te bwai ae kakawaki ae raba.” (Taeka N Rabakau 2:1-5, BG) Ko na buokaki ni moana am kakaae n te tabo n tangoboki n Te Tabo n Taromauri.

• Baikara bwaai n ibuobuoki ibukin te ukeuke n reirei aika tauraoi n te tabo n tangoboki n Te Tabo n Taromauri?

• Antai aika kona ni buokiko ibukini kabonganaan raoi te tabo n tangoboki?