Yuús Papiinium aents yaunchuk pujuármiania nu áujmatsamu, tui pujuarmia nusha, warinia túrawarmia nusha nekaátasam wakérakmeka, nuyánchuka Yuusa chichame ame iwiaákmarmin itiúr yainmákminiait nusha nekaataj takumka, ii irúntairin bibliotécanam papií íruneana nu unuimiátramniaitme.

Testigos de Jehová irúntairin bibliotécanam nukap papií unuimiátratin íruneawai. Yuusna nuú nukap unuimiátrattsam, papií mash achíakchakmeka, ii irúntairin bibliotécanam papií yamaram najánkamu íruneana nujai unuimiátramniaitme. Nuinkia Yuús Papií nukap najánkamu, Yuusna áujmatainia papiisha, diccionáriosha íruneawai. Ame wakérakmeka irúntratin juáreatsain túrutskesh amukámtainksha unuimiárminiaitme. Tura computadora ákuinkia Watchtower Library tana nui enkemám nukap papií najántramu wainkiáttame. Nuinkia warinsha chicham Yuusna eakám unuimiátramniaitme, túrutskesha Yuús Papií capítulori nuya versículori unuimiátrattsamsha eákminiaitme.

Irúntramunam iniákmamsatniuitkiumka bibliotécanam unuimiátramniaitme. Irúntramunam “Jesús itiurmia núnisrik túrawartai” tu unuimiátratniun chichamprukat tusa anáikiamu awai. Niinkia bibliotécanam papiín iwiárniuiti, papií yamármancha chumpíniaiti. Amesha bibliotécanam unuimiártasam wakérakmeka nii anintrúsminiaitme. Nuyánchuka Yuús Papiín unuítiameana núkesha anintrúsminiaitme. Antsu bibliotécanam papií írunna nuka jaaraíp, shait amajkíp, nunianka papií jukíp.

Yuús Papiinium tawai, mátsatkamu Beréanmaya aentska Yuusa chichamen paant nekaátasar “tuke tsawant [...] Yusa papiri̱n ii wearmiayi” (Túramu [Hechos] 17:11). Amesha áintsamek túramniaitme. Warinsha nekaáchmeka ii irúntairin bibliotécanam unuimiátramniaitme.

• Ii irúntairin bibliotécanam warí írunea?

• Itiurkamea bibliotécanam unuimiárminiaitiam?