Na a Chyum Laika hpaji grau jat wa na matu tam sawk sagawn mayu ai kun? Chyum Laika hta lawm ai Chyum daw langai, masha langai, shara langai, rai langai ngai a lam chye mayu ai kun? Shing nrai, nang hkrum nga ai manghkang ni hpe hparan ai hta, Karai a Mungga gaw gara hku karum ya lu ai hpe chye mayu ai kun? Rai yang, Nawku Htingnu hta nga ai laika dum hta hkaja mai ai.

Tam sawk sagawn ai hta ra na laili laika ni nga ai. Na a amyu ga hte Yehowa Sakse Ni shapraw da ai, Chyum Laika hpe madung tawn ai laili laika ni yawng nang hta nga na nre. Raitim, Nawku Htingnu hta nga ai laika dum hta gaw, nau nna shi ai aten hta shapraw da ai laili laika yawng ngu na daram nga ai. Dai hta ga gale da ai Chyum Laika amyu myu, ga htai chyum hte, kaga matsun laika buk ni nga ai. Laika dum hpe zuphpawng n hpang shi yang hte ngut ai hpang mai lang ai. Lama wa computer tawn da yang, Sin Langchyi Laika Dum hpe bang da na re. Sin Langchyi Laika Dum gaw, anhte a laili laika law law hpe mahkawng nna bang da ai, computer program langai rai nna, nang tam mayu ai lam, ga si, chyum daw hpe, aloi sha tam lu hkra galaw da ya ai.

Hkristan Prat Hte Magam Zuphpawng gaw, jawng ma ni a matu akyu rawng ai. Nang gaw dai jawng kaw mying jahpan bang da yang, na a lit hpe hkyen lajang ai shaloi, Nawku Htingnu Laika Dum hpe mai lang ai. Laika dum hpe woi awn ai wa gaw, Hkristan Prat Hte Magam Zuphpawng Hpaawn re. Shi gaw laika dum hta laili laika nnan ni nga na matu hte, shi shara hte shara atsawm sha tawn da na matu lit nga ai. Shi hpe shing nrai, nang hpe Chyum Laika sharin ya ai wa hpe, Nang ra ai lam gara hku tam na hpe mai san ai. Raitim, laika buk ni hpe gaw shinggan de nmai la mat ai. Laika buk ni hpe anhte atsawm sha lang nna, mahkret ai lam ni nmai galaw ga ai.

“Karai Kasang hpe chye chyang ai nyan” hpe lu mayu ai nga yang “makoi da ai sut rai” hpe tam ai zawn, tam mayu ai myit nga ra ai ngu nna Chyum Laika hta tsun da ai. (Ga Shagawp 2:1-5) Nang tam sawk sagawn hpang na matu, Nawku Htingnu hta nga ai laika dum gaw karum ya lu ai.

• Nawku Htingnu laika dum hta tam sawk sagawn na matu hpa ni nga a ta?

• Laika dum hpe atsawm sha chye jailang hkra nang hpe kadai gaw karum ya lu a ta?