Hato phi kwah ban wad bniah ban tip shuh shuh ïa ka Baibl? Hato phi kwah ban tip shaphang kano kano ka dkhot ne uno uno u briew, ne ka jaka, ne ïa kaei kaei ba la thoh ha ka Baibl? Ne hato phi la ju pyrkhat la ka ktien U Blei ka lah ne em ban ïarap ïa ki jingeh jong phi? Haba kumta, phi lah ban pyndonkam ïa ka library kaba don ha ka Ïing Hima.

Ka ai ki jingïarap ban wad bniah. Lehse phim don baroh ki kot jong ki Nongsakhi U Jehobah ba la pynshong nongrim na ka Baibl ha ka ktien jong phi. Hynrei ka library ha ka Ïing Hima ka don shibun ki kot ba dang pynmih thymmai. Ka lah ban don ruh shibun ki jingpynkyllaktien, ka dikshoneri babha bad kiwei de ki lad jingïarap. Phi lah ban pyndonkam ïa ka library ha shuwa ne hadien ka jingïalang. Lada don ka kompiwtor, ka lah ban don ka Library jong ka Kut Ap Phira ha ka. Kane ka prokram ka kynthup ïa ka jinglum ïa ki kot bad ka pynsuk ban wad ïa ki phang, ki kyntien ne ki dkhot.

Ka long kaba myntoi na ka bynta ki nongshim bynta ha ka Jingïalang ka Jingim bad ka Kam Ïalap. Phi lah ban pyndonkam ïa ka library kaba don ha ka Ïing Hima haba phi pynkhreh ïa la ka bynta. U nongpynïaid ha ka Jingïalang ka Jingim bad ka Kam Ïalap u peit ïa ka library. U kit khlieh ban pynthikna ba ki kot ki sla bathymmai ki biang bad ba la pynbeit bha ïa ki. Ma u ne i nonghikai Baibl jong phi i lah ban pyni ïa phi kumno ban wad ïa ka jingtip kaba phi donkam. Tangba, ym dei ban rah ïa ki kot shabar ka Ïing Hima. Kumjuh, ngi dei ban sumar ïa ki kot bad ngim dei ban buh dak haba ngi pyndonkam ïa ki.

Ka Baibl ka batai ba, ban wad ïa ka “jingtip” jong U Blei, ngi dei ban long kiba kloi ban wad ïa ka “kum ia ki spah ba la buhrieh.” (Proberb 2:1-5) Ka library kaba don ha ka Ïing Hima ka lah ban ïarap ïa phi ban sdang ïa ki jingwad.

• Kiei ki jingwad bniah kiba ngi don ha ka library jong ka Ïing Hima?

• Mano ba lah ban ïarap ïa phi ban pyndonkam bha ïa ka library?