တၢ်မၤလိ ၂၇
ဘီမုၢ်ဘျီၣ်ဒိၣ် အလံာ်ရိဒၢးန့ၣ် အဘျုးအိၣ်လၢ ပဂီၢ်ဒ်လဲၣ်
ကီၢ်အံးစရ့ (လ်)
ကီၢ် ခၠဲး ရံၤဖၢဘျံး
ကီၢ်ဘဲနံ(န်)
က့ၣ်မ်(န်) ကီး
မ့ၢ်နအဲၣ်ဒိးဃုသ့ၣ်ညါတၢ် ဒ်သိးနတၢ်သ့ၣ်ညါလံာ်စီဆှံ ကအါထီၣ်အဂီၢ်ဧါ. မ့ၢ်နအဲၣ်ဒိးဃုသ့ၣ်ညါ လံာ်စီဆှံတဆၢ မ့တမ့ၢ် ပှၤတဂၤဂၤအဂ့ၢ်ဧါ, တၢ်လီၢ်တၢ်ကျဲ မ့တမ့ၢ် တၢ်အိၣ်လၢလံာ်စီဆှံပူၤတမံၤမံၤအဂ့ၢ်ဧါ. ဖဲနကွၢ်ဆၢၣ်မဲာ်ဘၣ် တၢ်ကီတၢ်ခဲအခါ ယွၤအကလုၢ်ကထါ မၤစၢၤနၤကသ့ဒ်လဲၣ်. နမ့ၢ်အဲၣ်ဒိးဃုသ့ၣ်ညါ တၢ်ဂ့ၢ်တဖၣ်အံၤန့ၣ် နလဲၤဆူဘီမုၢ်ဘျီၣ်ဒိၣ် အလံာ်ရိဒၢးသ့လီၤ.
လံာ်ရိဒၢးန့ၣ် အိၣ်ဒီးတၢ်အပီးအလီလၢ ကမၤစၢၤပှၤလၢ ပကဃုသ့ၣ်ညါတၢ်အဂီၢ်လီၤ. လံာ်လဲၢ်တဖၣ်လၢ ယဟိဝၤပှၤအုၣ်အသးထုးထီၣ်ဝဲ လၢနကျိာ်န့ၣ်ဘၣ်သ့ၣ်သ့ၣ် တအိၣ်လၢနအိၣ်ခဲလၢာ်ဘၣ်. ဘၣ်ဆၣ်, လၢဘီမုၢ်ဘျီၣ်ဒိၣ်လံာ်ရိဒၢးအပူၤန့ၣ် လံာ်လဲၢ်လၢဘၣ်တၢ်ထုးထီၣ်အီၤ တယံာ်ဒံးဘၣ်တဖၣ် ကအိၣ်ဝဲခဲလၢာ်ဃၣ်ဃၣ်လီၤ. ဘၣ်သ့ၣ်သ့ၣ် တၢ်ကွဲးကျိာ်ထံ လံာ်စီဆှံကအိၣ်ဝဲအါဘ့ၣ်, လံာ်ခီယ့ၤလၢအဂ့ၤ, ဒီးလံာ်ဟ့ၣ်ကူၣ်အဂၤတဖၣ် ကအိၣ်ဝဲစ့ၢ်ကီးလီၤ. တချုးလၢတၢ်အိၣ်ဖှိၣ်ရိဖှိၣ်စးထီၣ်ဒီး တၢ်အိၣ်ဖှိၣ်ရိဖှိၣ်မ့ၢ်ဝံၤအလီၢ်ခံန့ၣ် နသူလံာ်ရိဒၢးအံၤသ့လီၤ. ခီၣ်ဖၠူထၢၣ်မ့ၢ်အိၣ် လၢလံာ်ရိဒၢးအပူၤန့ၣ် ဘၣ်သ့ၣ်သ့ၣ်ပှၤကထၢနုာ်ပာ် တၢးထီခိးတၢ်လံာ်ရိဒၢး လၢအပူၤလီၤ. တၢးထီခိးတၢ်လံာ်ရိဒၢး န့ၣ်မ့ၢ်ခီၣ်ဖၠူထၢၣ်တၢ်ရဲၣ်တၢ်ကျဲၤတခါလၢ ပှၤထၢနုာ်ဃာ်ပလံာ်လဲၢ်အါမးဒီး ဘၣ်တၢ်ကတဲာ်ကတီၤအီၤဒ်သိး နဃုသ့ၣ်ညါတၢ်ဂ့ၢ်တမံၤမံၤ, တၢ်ကတိၤတဘီဘီ မ့တမ့ၢ် လံာ်စီဆှံအဆၢတဆၢဆၢ ကညီအဂီၢ်လီၤ.
ဘီမုၢ်ဘျီၣ်ဒိၣ်အလံာ်ရိဒၢးအံၤ အဘျုးအိၣ်လၢ ခရံာ်ဖိတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိတဖၣ်အဂီၢ်လီၤ. နမ့မ့ၢ်ကၠိဖိတဂၤန့ၣ် ဖဲနကတဲာ်ကတီၤနမူဒါအခါ ဘီမုၢ်ဘျီၣ်ဒိၣ်အလံာ်ရိဒၢးအံၤ မၤစၢၤနၤသ့လီၤ. ခရံာ်ဖိတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိအပှၤကွၢ်ထွဲတၢ်န့ၣ် ကွၢ်ထွဲစ့ၢ်ကီးဝဲ လံာ်ရိဒၢးလီၤ. အဝဲကဘၣ်ရဲၣ်ကျဲၤဒ်သိး လံာ်လဲၢ်လၢဘၣ်တၢ်ထုးထီၣ်အီၤအသီတဖၣ် ကအိၣ်လၢလံာ်ရိဒၢးအပူၤ ဒီးကအိၣ်လၢအလီၢ်ဘၣ်ကျဲဘၣ်အဂီၢ်လီၤ. ပှၤလၢအကွၢ်ထွဲ တၢ်စံၣ်တဲၤတဲလီၤတၢ်ကၠိ မ့တမ့ၢ် ပှၤလၢအသိၣ်လိနၤလံာ်စီဆှံတဂၤန့ၣ် ကသိၣ်လိနၤဒ်သိး နဃုထံၣ်န့ၢ် တၢ်ဂ့ၢ်လၢနအဲၣ်ဒိးသ့ၣ်ညါတဖၣ် ကသ့အဂီၢ်န့ၣ်လီၤ. ဘၣ်ဆၣ်, လံာ်လဲၢ်တဖၣ်လၢအိၣ်လၢ လံာ်ရိဒၢးအပူၤန့ၣ် ပတကြၢးစိာ်အီၤဆူ ဘီမုၢ်ဘျီၣ်ဒိၣ်အချၢဘၣ်. ပအဲၣ်ဒိးဖီၣ်လံာ်တဖၣ်အံၤဂ့ၤဂ့ၤဒီး ပတကြၢးကွဲးတၢ်လၢ လံာ်လဲၢ်တဖၣ်အံၤအပူၤ နီတမံၤဘၣ်.
လံာ်စီဆှံတဲနၢ်ပၢၢ်ပှၤလၢ ပမ့ၢ်အဲၣ်ဒိးထံၣ်န့ၢ် “တၢ်သ့ၣ်ညါယွၤ” န့ၣ်ပကဘၣ်သးအိၣ် ဃုအီၤဒ်ပှၤဃု “တၢ်လုၢ်ဒိၣ်ပှ့ၤဒိၣ်အိၣ်ခူသူၣ်အသိး” လီၤ. (ကတိၤဒိ ၂:၁-၅) ဘီမုၢ်ဘျီၣ်ဒိၣ်အလံာ်ရိဒၢးအံၤ မၤစၢၤနၤသ့လၢ နကစးထီၣ်ဃုသ့ၣ်ညါတၢ်အဂီၢ်လီၤ.
-
ဒ်သိးနကဃုသ့ၣ်ညါတၢ်အဂီၢ် ဘီမုၣ်ဘျီၣ်ဒိၣ်အလံာ်ရိဒၢးန့ၣ် အိၣ်ဒီးတၢ်အပီးအလီမနုၤတဖၣ်လဲၣ်.
-
နဃုသ့ၣ်ညါတၢ်လၢ လံာ်ရိဒၢးအပူၤ ကသ့ဂ့ၤဂ့ၤအဂီၢ် မတၤတဂၤမၤစၢၤနၤသ့လဲၣ်.
