Nge kesepela kusosasosa samu na kubuela nzayilu na nge ya Biblia? Nge kele na nsatu ya kubakusa verse mosi ya Biblia, to kuzaba muntu mosi to kisika mosi yina Biblia metubila? To nge mekukiyuvusaka kana Mpova ya Nzambi lenda sadisa nge na diambu mosi yina kena kutungisa nge? Kana yau kele mutindu yina, kuenda sosa na bibloteke ya Yinzo ya Kimfumu.

Yau kele na mikanda mpe bima ya nkaka samu na kusosasosa. Kukondua ntembe, nge kele ve na mikanda nionso ya Bambangi ya Yehova yina ketubilaka Biblia, yina mebimaka na ndinga na nge. Nzokande na bibloteke ya Yinzo ya Kimfumu, yakele na mikanda mingi yina mekatuka kubima. Yau lenda vuanda na bambangudulu yankaka ya Biblia, diksionere mosi ya mbote, mpe mikanda yankaka samu na kusosasosa. Nge lenda sadila bima nionso yina kele na bibloteke tekila mpe na manima ya lukutakanu. Kana ordinatere kele, yau lenda vuanda na Watchtower Library. Yau kele bibloteke ya elektroniki yina kele na mikanda na beto mingi mpe yina kele pete samu na kusosasosa diambu, mpova to verse mosi.

Yau kesadisa mpenza bana ya kalasi na lukutakanu Luzingu mpe Kisalu ya Baklisto. Nge lenda sadila mbote mbote mikanda yina kele na bibloteke ya Yinzo ya Kimfumu ntangu nge kena bongisa masolo na nge. Nkengidi ya kalasi kele na kiyekua ya kutadila bibloteke yango. Yandi kele diaka na kiyekua ya kubuela mikanda nionso mekatuka bima mpe kutula mikanda na mulongo. Yandi to mpangi yina kelongukaka na nge Biblia balenda monisa nge mutindu nge lenda mona diambu nge kena kusosa. Kasi, muntu mosi ve fueti baka mukanda ya bibloteke ya Yinzo ya Kimfumu mpe kunata yau. Beto fueti kusadila mikanda yango na mayele mpe kusonika na kati ve.

Biblia metuba ti samu na kubaka ‘nzayilu mpenza ya Nzambi,’ beto fueti sosasosa lokola ‘bima ya mfunu yina mesuekama.’ (Bingana 2:1-5) Bibloteke ya Yinzo ya Kimfumu lenda sadisa nge samu nge banda kusosa nzayilu yango.

• Na Yinzo ya Kimfumu, yinki bima lenda sadisa samu na kusosasosa?

• Nani lenda sadisa nge samu nge zaba kusadila bibloteke mbote?