Nga ozolele vavulula mambu mu wokesa o zayi waku wa Nkand’a Nzambi? Nga ozolele zaya sono, muntu yovo fulu ye mambu makaka meyikwanga muna Nkand’a Nzambi? Nga ozolele zaya kana vo Nkand’a Nzambi ulenda kusadisa mu mambu mekutokanesanga? Avo i wau, ndá vavulula muna lundilu dia nkanda dina muna Seka dia Kintinu.

Muna ye sadilwa ilenda kusadisa mu vavulula. Nanga muna nding’aku kuna ye nkanda miawonso ko mia Mbangi za Yave misasilanga Nkand’a Nzambi. Kansi, e lundilu dia nkanda dina muna Seka dia Kintinu dina ye nkanda miayingi miampa. Mulenda kala mpe ye nsekola zakaka za Bibila, disionario diambote ye nkanda miakaka. Olenda kwaku vavulula mambu muna nkanda mina mo una lukutakanu ke lwayantikidi ko ye kuna mfoko a lukutakanu. Avo muna ye komputador mun’elundilu diadi, nanga mulenda kala ye Biblioteca da Torre de Vigia. E programa yayi ya komputador ina ye ulolo wa nkanda mieto milenda kusadisa mu vavulula diambu, mvovo yovo sono kia Nkand’a Nzambi.

Diamfunu kw’alongoki muna Lukutakanu lwa Zingu ye Salu Kieto. Olenda kwenda muna lundilu dina muna Seka dia Kintinu mu kubika malongi otambula. O nkengi a lukutakanu Zingu ye Salu Kieto kia Kikristu yandi olunga-lunganga e lundilu. Una ye mbebe ya zaya kana vo e nkanda miampa mina kala muna lundilu. Yandi yovo nlongi aku a Nkand’a Nzambi balenda kusadisa mu solola mambu ovuidi o mfunu. Kunati nkanda ko mina muna lundilu dia Seka dia Kintinu. Kansi, tufwete mio toma lunga-lunganga yo lembi mio soneka.

Nkand’a Nzambi usonganga vo muna ‘solola o zayi wa Nzambi,’ tufwete wo vavulula “nga tusalu twaswekama.” (Ngana 2:​1-5) E lundilu dina muna Seka dia Kintinu dilenda kusadisa mu yantika vavulula.

• Nkia sadilwa ina muna Seka dia Kintinu ilenda kusadisa mu vavulula mambu?

• Nani olenda kusadisa mu toma sadila lundilu diadi?