Sa inga mwasuna kulangoola makani kwaamba ayi mushibe shiinji shamu Baibo? Sa kuli lilembo, muntu, musena na cintu cimwi cakaambwa muBaibo nceenga mwasuna kushiba? Mpashi mulisuni kushiba mbweenga Maswi akwe Lesa amucafwa na mwalisukama. Laibulali ya paŊanda ya Bwaami inga yamucafwa.

Mulacanika mabuku eenga amucafwa kucana makani ngomutolangoola. Mpashi tamucitewo mabuku oonse aBakamboni Bakwe Yehova mumushobo wanu. Sombi na mwaya mu laibulali ya paŊanda ya Bwaami, mulaakucana mabuku aanji acoonoono. Mumwi mulaba amaBaibo apusenepusene, madikishonali abotu alimwi amabuku amwi mucanika makani amwi. Inga mwasebenseshaako mabuku amu laibulali, mabungano kaatana kutalika alimwi apesule lya mabungano. Na bakabikaamo kompyuta, nkokwaamba ayi ilyeelete kuba a Watchtower Library. Iyi ni laibulali ya pakompyuta icite mabuku esu aanji ngweenga twabelenga peenka palya. Pali apulogilamu itucafwa kucana bwangu makani, njeenga mwasebensesha na mutolangoola mutwi, liswi, na lilembo.

Ilacafwa abuumbi kumabungano Abuumi alimwi Anciito. Inga mwasebenseshaako laibulali ya paŊanda ya Bwaami kulibambila makani. Mutanjilili wa kubungana kwa Buumi alimwi Anciito ngolanga sha laibulali. Ulyeelete kubona kwaamba ayi magazini alimwi amabuku amwi aconoono mwaali akwaamba ayi alibikitwe kabotu kabotu. Shikumwiisha Baibo na mutanjilili wa kubungana kwa Buumi alimwi Anciito inga wamucafwa kushiba mbweenga mwalangoola makani ngomusuni. Sombi tamweelete kubwesa libuku lililyoonse kuswa mu laibulali akuyaayo kuŋanda sobwe. Alimwi tulyeelete kulama kabotu mabuku, tamweelete kulembaamo nabi kupentaamo sobwe.

Baibo ilasansulula ayi, kwaamba ayi tucane makani eenga atucafwa kuba a ‘lushibo pali Lesa,’ tulyeelete ‘kuyandoola cankusu bweenka mbotuyandoola buboni.’ (Tushimpi 2:1-5) Inga mwasebensesha laibulali ya paŊanda ya Bwaami kulangoola makani.

• Ino mulaba nshi mu laibulali ya paŊanda ya Bwaami nsheenga twasebensesha kulangoola makani?

• Ino mbaani beenga bamucafwa kushiba bwakusebensesha laibulali?