Библийым сайрак умылаш манын, иктаж-могай темым шымлаш кумылда уло мо? Ала те иктаж-могай библийысе почеламутым умылен налнеда? Библийым лудмыда годым палыдыме еҥ, ола але ӱзгар дене тӱкненда да ынде нунын нерген шукырак пален налнеда, ала? А, можыч, тендан иктаж-могай нелылыкда уло да те библийысе каҥашым кычалыда? Тугеже Вашлиймаш залын библиотекыже тыланда пайдале лийын кертеш.

Шымлаш полшышо ӱзгар. Лийын кертеш, шочмо йылмыда дене чыла публикаций тендан уке, а Вашлиймаш залын библиотекыштыже уло. Библиотекыш эре у публикацийым ешарат. Тушто мемнан публикаций-влакым веле огыл, тыгак Библийын тӱрлӧ кусарымашыжым, мутер да энциклопедий-влакым муаш лиеш. Библиотекыш вашлиймаш деч ончыч але вара толаш лиеш. Библиотекыште компьютер уло гын, тушто Орол Башньын электронный библиотекыже (Watchtower Library) лийшаш. Тиде программыште шуко публикацийна улыт. Программым кучылташ куштылго. Тудо кӱлешан мутым, темым але библийысе почеламутым вашке муаш полша.

«Илыш ден служымаш» вашлиймашлан ямдылалташлан пайдале. Тыланда вашлиймашлан заданийым ямдылаш кӱлеш гын, Залын библиотекышкыже толын кертыда. Библиотекым «Илыш ден служымаш» вашлиймашым вӱдышӧ иза онча. Тудо библиотекым шот дене кучылтмым да тушан у публикаций ешарымым эскера. «Илыш ден служымаш» вашлиймашым вӱдышӧ иза але нуно, кӧмыт тендан дене Библийым шымлат, тыланда ончыктен кертыт, кузе кӱлешан информацийым муаш лиеш. Книгам библиотеке гыч налын каяш огеш лий. Книгам аклаш кӱлеш, тушто возаш огеш йӧрӧ.

Библийыште возымо почеш, Юмо нерген шинчымашым муаш манын, тудым тойымо поянлык семын кычалаш кӱлеш (Притчи 2:1—5). Тидым ышташ Вашлиймаш залын библиотекыже полша.

• Вашлиймаш залын библиотекыштыже мом муаш лиеш?

• Библиотекым кучылташ кӧ туныктен кертеш?